काठमाडौं, २५ जेठ-हवाई इन्धनको मूल्य घटेपछि वायुसेवा सञ्चालकहरूको छाता सङ्गठन वायुसेवा सञ्चालक सङ्घले हवाईजहाजको भाडा घटाएको छ । नेपाल नागरिक उड्डयन प्राधिकरणले हवाई इन्धनको मूल्य समायोजनको निर्णय कार्यान्वयन गराउन सङ्घलाई आजै पत्राचार गरेपछि हवाई भाडादर घटाइएको सङ्घले विज्ञप्तिमार्फत् जनाएको हो ।

हवाई इन्धनको मूल्य घटेको अनुपातमा स्वचालित प्रणालीअनुसार मूल्य लागू गर्ने सरकारको निर्णय र सोहीअनुरुप प्राधिकरणको २५ जेठ २०७७ को पत्रबाट अनुमोदन गरी कार्यान्वयनका लागि लेखी आएकाले हवाईभाडामा नयाँ फ्युल चार्ज कायम गरिएको आज जारी भनिएको छ।

नयाँ भाडादरअनुसार काठमाडौं माउन्टेन उडानका लागि ८ सय ६० घटाएर २ हजार २ सय ३० रूपैयाँ कायम गरिएको छ । काठमाडौं-भद्रपुरको ७ सय ५० घटाइ १ हजार ९ सय ५० रूपैयाँ बनाइएको छ । काठमाडौं-विराटनगर गन्तव्यमा साविकको २ हजार १६० बाट ६ सय घटाएर १ हजार ५ सय ५० रूपैयाँ कायम गरिएको छ ।

पोखराको २७० घटाएर ६ सय ९५ रूपैयाँ बनाइएको छ । काठमाडौं-धनगढीको साविकको ३ न हजार ९ सय ७५ बाट १ हजार १०५ घटाई २ हजार ८ सय ७० रूपैयाँ निर्धारण गरिएको छ । काठमाडौं-नेपालगञ्जको ८१५ घटाई २ हजार ११५ रूपैयाँ बनाइएको छ । सबैभन्दा कम काठमाडौं-सिमरामा ५ सय ५८ र सबैभन्दा बढी काठमाडौं-धनगढी गन्तव्यको भाडा रहेको छ ।

हवाई इन्धनको मूल्य जे-जति घटबढ हुन्छ सोही अनुपातमा स्वचालित प्रणालीअनुसार मूल्य लागू गर्ने गरी नेपाल सरकार (विभागीय मन्त्री) को २०७५ जेठ २७ निर्णय गरेको थियो । सोही निर्णयअनुसार सङ्घमा आबद्ध वायुसेवा कम्पनीले स्वचालित प्रणालीअनुसार हवाई इन्धनको मूल्य समायोजन गर्ने निर्णय गरिएको सङ्घका महासचिव योगराज कँडेल शर्माले बताए ।

कोभिड-१९ महामारी नियन्त्रणका लागि सरकारले चैत ११ देखि देशभर बन्दाबन्दी गरेको छ । चैत ९ गतेदेखि नै नेपालमा उडान भर्ने सबै अन्तर्राष्ट्रिय उडान तथा चैत ११ देखि नै आन्तरिक उडान पनि स्थगन गरिएको छ । पछिल्लोपटक असार १६ सम्म उडान स्थगन गरिएको छ । आगामी १७ असारदेखि आन्तरिक उडान सञ्चालन गर्ने सरोकारवाला निकायले तयारी गरिरहेका छन् । रासस