जनकपुरधाम, २२ जेठ-वीरगञ्जको विशेष कोरोना अस्पतालबाट कोरोना भाइरस (कोभिड-१९) को संक्रमणलाई जितेर आज ५ जना घर फर्किएका छन् । योसहित प्रदेश २ बाट कोरोना जित्नेको संख्या १ सय ९ पुगेको छ ।

आज पर्साको जिराभवानी गाउँपालिका ४ का २५ वर्षीय पुरुष, वीरगञ्ज महानगरपालिका ५ का २५ वर्षीय पुरुष र वीरगन्ज महानगरपालिका १६ का ७० वर्षीय पुरुष डिस्चार्ज गरिएको अस्पतालका को–अर्डिनेटर डाक्टर उदयनारायण सिंहले जानकारी दिएका छन् ।

यस्तै, बाराको कलैयास्थित नेपाली सेनाको गणमा कार्यरत ३५ र ३६ वर्षका २ सेनालाई पनि आजै नै डिस्चार्ज गरिएको छ । अस्पताल बसाइँको पछिल्लो लगातार २ पटकको पीसीआर रिपोर्ट नेगेटिभ आएको र स्वास्थ्यमा कुनै समस्या नभएपछि उनीहरूलाई डिस्चार्ज गरिएको सिंहले जानकारी दिए ।

बिहीबार ५ जनालाई डिस्चार्ज गरिएपछि गण्डकस्थित विशेष कोरोना अस्थायी अस्पतालमा अब २८ जना संक्रमित रहेको सिंहले जानकारी दिएका छन् । अस्पतालमा पर्साका २२ जना, बाराका ३ जना र रौतहटको ३ गरी २८ जना संक्रमित उपचाररत रहेका छन् । प्रदेश २ मा कुल संक्रमितको संख्या ८ सय ५९ रहेको छ ।

पर्सामा हालसम्म ३ हजार ८ सय ६७ जनाको स्वाब कलेक्सन गरिएको छ । १४ वटा पालिकामा स्थापना गरिएका ३६ वटा क्वारेन्टाइन केन्द्रमा ८० जना महिलासहित ७ सय २३ जना शंकास्पद संक्रमितलाई राखिएको छ ।