काठमाडौं,२१ जेठ-कोरोना भाइरस (कोभिड–१९) का कारण देश लकडाउनमा छ । ११ चैतदेखि सुरु भएको लकडाउन ३२ जेठसम्म लम्बिएको छ । कोरोना सक्रमितको तथ्याङ्क बढ्दो छ ।

बुधबारसम्म देशभर २ हजारभन्दा बढीमा कोरोना पुष्टि भएको छ । कोरोनाका कारण ८ जनाको मृत्यु भइसकेको छ । लकडाउनले गर्दा होटल, कलकारखाना, उद्योगहरू सबै पूर्ण रूपमा बन्द अवस्थामा छन् ।

लकडाउनकै कारण हजाराैँ मजदुरले रोजगारी गुमाएका छन् । यो क्रम अझै जारी रहने कतिपय रोजगारदाता कम्पनीको भनाइ छ । कोरोनाका कारण देशभर रोजगार गुमाउनेहरूको तथ्यांक यकिन नभए पनि लाखाैँ मजदुर यसको मारमा परेका छन् ।

लकडाउनले चम्किएकाे कैदीबन्दीको रोजगार

लकडाउनले लाखौँको रोजगारी गुम्दा पनि कारागारभित्र रहेका कैदीबन्दीहरूको रोजगार भने चम्किएको छ । उनीहरूलाई लकडाउनको कुनै पर्वाह छैन ।

लकडाउन नहुँदाजस्तै कारागार प्रशासनले कैदीबन्दीका लागि उपलब्ध गराएको उद्योगभित्र कैदीहरूले आ–आफ्नो काम गर्दै आएको डिल्लीबजार कारागारका प्रमुख जेलर अरुण पोखरेलले बताए ।

‘लकडाउनका कारण कैदीहरूको रोजगारी भने अझ बढेको छ । उनीहरूलाई अहिले काम गर्न समस्या पनि भएको छैन । बरु लकडाउन नहुँदा उनीहरूका आफन्त भेट्न आउँथे काममा डिस्टर्ब हुन्थ्यो । अहिले आफन्तसँगको भेटघाट रोकेका छौँ । त्यस कारण पनि उनीहरूले मजासँगले तनावमुक्त भएर काम गर्न पाएका छन्,’ जेलर पोखरेलले भने ।

डिल्लीबजार कारागारभित्र गलैँचा, फर्निचर उद्योग, सुन बनाउने काम निरन्तर रूपमा चलेको पोखरेलले बताए । सामग्री निर्माणका लागि बाहिरका कम्पनीहरूले कच्चा पदार्थ उपलब्ध गराउने र कैदीहरूले निर्माण गर्ने गरेको जेलर पोखरेलको भनाइ छ ।

त्यसरी नै सुन्धारा कारागारभित्रका कैदीहरूले पनि पर्स, पोते बुन्ने, मुडा बनाउने कामना निरिन्तरता दिइरहेकाे सुन्धारा कारागारका जेलर लक्ष्मीप्रसाद बाँस्कोटाले बताए ।

‘कारागारभित्र कमाएर घर खर्च दिने कैदीबन्दीहरू पनि यस जेलभित्र छन् । कारागारभित्र मेहनत गर्ने कैदीहरूको काममा असर नपुगोस् भनेर हामीले त्यस्तो काम गर्ने कैदीहरूलाई सहुलियत दिने काम गरेका छौँ,’ उनले भने ।

सुन्धारा कारागारभित्रको सरकारी कपडा उद्योग भने बन्द रहेको उनको भनाइ छ । हाल देशभरका कारागारभित्रका कैदीबन्दीहरूले विभिन्न घरेलु सामग्री उत्पादन गर्दै आएको कारागार विभागले जनाएको छ ।