सुर्खेत, १२ जेठ-कर्णाली प्रदेश प्रयोगशालामा कोरोना पोजिटिभ देखिएका ५ जनाको थप परीक्षणका लागि नेपालगञ्ज पठाइएकोमा त्यहाँ पनि नतिजा पोजिटिभ देखिएको छ ।

नेपालञ्जमा गरिएको परीक्षणमा पाँचै जनामा  संक्रमण पुष्टि भएको प्रदेश स्वास्थ्य  निर्देशनालयकी निर्देशक डा. रीता भण्डारी जोशीले जानकारी दिइन् । यो सँगै कर्णालीमा कोरोनाबाट संक्रमित हुनेको संख्या ९ पुगेको छ ।

नयाँ संक्रमित हुनेमा दैलेखको नारायण नगरपालिका-३ का १५ वर्षीय किशोर, नारायण नगरपालिका-६ का १६ वर्षीय किशोर, त्यसैगरी डुङ्गेश्वर गाउँपालिका-१ का २९ वर्षीय १ पुरुषसँगै २७ वर्षीया उनकी श्रीमती र सोही वडाका २७ वर्षीय युवक रहेका छन् ।

उनीहरू सबै केही दिनअघि भारतबाट आएका थिए । संक्रमण पुष्टि भएका पाँचै जनालाई आइतबार नै सदरमुकामको सरस्वती मावि तर्ताङ्गमा रहेको कोरोना आइसोलेसन वार्डमा राखिएको स्वास्थ्य सेवा कार्यालय दैलेखका कोभिड फोकलपर्सन थीरप्रसाद रेग्मीले जानकारी दिए ।