झापा, जेठ ७-सांसद राजेन्द्र लिङ्देलले गृहजिल्ला झापाको कचनवलमा कोरोना संक्रमित पुष्टि भएपछि सावधानी अपनाउन आग्रह गरेका छन् । झापा–३ बाट निर्वाचित लिङ्देलले संक्रमित बढे पनि नआत्तिन र सावधानी अपनाउन आग्रह गरेका हुन् ।

‘ज्यालामजदुरीका सन्दर्भमा भारतका विभिन्न स्थानमा रहेका दाजुभाइहरूलाई आफू कार्यरत स्थलमा खान बस्न समेत गाह्रो भएपछि जोखिम मोलेर आफ्नो देश फर्किनुको कुनै विकल्प थिएन’ उनले सााजिक सञ्जालमा लेखेका छन्, ‘अचानक भित्रिने ठूलो संख्यासँगै संक्रमित पनि धेरै देखिएका छन् । अझै पनि भारतबाट दाजुभाइहरू आउनेक्रम जारी रहेकाले संक्रमितको संख्या बढ्न पनि सक्छ । यसबाट आतंकित हुनेभन्दा पनि संक्रमण समाजमा फैलन नदिन सावधानी अपनाउन अपिल गर्दछु ।’

अहिलेसम्म यो भाइरसको औषधि नबनेको स्मरण गर्दै उनले भारतबाट आउनेलाई सिधै क्वारेन्टाइनमा राख्न सहयोग गर्न, अनावश्यक घरबाट ननिस्कन, समाजमा भ्रम र आतंक सिर्जना नगर्न जिल्लाबासीमा आग्रहसमेत गरेका छन् ।

कचनकवल गाउँपालिकामा अहिलेसम्म १० जनामा कोरोना संक्रमण पुष्टि भएको छ । संक्रमित पुष्टि भएसँगै त्यहाँका ५ वडासमेत सिल गरिएको छ । दक्षिण झापासँग सीमा जोडिएको यो गाउँपालिकाका १ देखि ५ सम्मका वडा सिल गरिएको हो ।