काठमाडौं, ६ जेठ-सोमबार कोरोना संक्रमण पुष्टि भएका गुल्मीका संक्रमितको अहिले क्रिमसन अस्पतालमा उपचार भइरहेको छ । अस्पतालका अनुसार मदाने गाउँपालिका-६ निवासी ४१ वर्षीय संक्रमितको भेन्टिलेटरमा राखेर उपचार भइरहेको हो ।

उनको स्वास्थ्य अवस्था गम्भीर भए पनि विभिन्न सञ्चारमाध्यममा मृत्यु भएको खबर आएको भन्दै अस्पतालले भ्रमपूर्ण समाचारको पछि नलाग्न आग्रह गरेको छ ।

आज एक विज्ञप्ति जारी गर्दै अस्पतालले संक्रमितको आइसीयू कक्षको भेन्टिलेटरमा उपचार जारी रहेकाले भ्रामक समाचारको विश्वास नगर्न आग्रह गरेको हो ।

ति संक्रमित व्यक्ति जेठ १ गते कोरोनाका सम्भावित लक्षण देखिएपछि अस्पतालमा परीक्षणका लागि आएका थिए । गत शुक्रबार स्वाब संकलन गरेर पीसीआर परीक्षणका लागि प्रादेशिक प्रयोगशाला बुटवलमा पठाउँदा सोमबार नतिजा पोजिटिभ आएको थियो ।