विराटनगर, बैशाख ३०–भारतीय मजदुरसंग रकम लिएर सीमा कटाउन खोज्ने दुईजनालाई प्रहरीले विराटनगरबाट नियन्त्रणमा लिएको छ । विराटनगर–१८ भेडियारी स्थित एकिकृत जाँचपास चौकी(आइसिपी) नजिकै दशगजाक्षेत्रबाट प्रहरीले उनिहरुलाई नियन्त्रणमा लिएको हो ।

नियन्त्रणमा लिइएका २ जना विराटनगर–६ सरौचियाका ३८ बर्षिय मुबारक हुसैन र सोहि ठाँउका २६ बर्षिय अख्तर आलम रहेका छन । उनिहरुले सुनसरीमोरङ औद्योगिक करिडोरमा काम गर्ने ४ जना भारतीय मजदुरलाई सीमा कटाईदिने सर्तमा प्रतिब्यक्ती भारु एक हजारका दरले रकम लिएका थिए ।

सीमा कटाउनैलाग्दा स्थानियवासीको सहयोगमा प्रहरीले भारतीय मजदुरसहित उनिहरुलाई समेत नियन्त्रणमा लियो । नियन्त्रणमा लिइएका बिरुद्ध अनुसन्धान भइरहेको इलाका प्रहरी कार्यालय रानीका प्रहरी निरीक्षक दिपक थापाले जानकारी दिए ।

सीमा कटाउन लागिएका ब्यक्तीहरु भारत राजस्थानबाट कामगर्न अएका भारतीय मजदुरहरु हुन । उनिहरु सुनसरी मोरङ औद्योगिक करीडोरमा रहेको कमला स्टिलमा काम गर्दै आएका थिए ।

लकडाउनयता बुढीगंगा गाँउपालिकामा उनिहरु रोकिएका थिए । एक हजार भारुमा सिमा कटाईदिने कुराकानी भएपछि आफुहरु मंगलबार विराटनगर हुँदै सिमाक्षेत्र आइपुगेको मजदुरहरुले बताएका छन ।