विराटनगर, बैशाख २९–बन्दाबन्दीकै बिच मोरङको जहदा गाउँपालिका–१ स्थित धुनीमा अति विपन्न सुकुम्बासी परिवारका लागि घर निर्माण प्रकृया सुरु भएको छ । पूर्वमन्त्री तथा मोरङ क्षेत्र नं. ५ का सांसद शिवकुमार मण्डलको पहलमा स्थानीय ३२ विपन्न सुकुम्बासी परिवारका लागि घर निर्माण सुरु भएको हो ।

निर्वाचन क्षेत्र पूर्वाधर विकास कार्यक्रम अन्तर्गत १ करोड १६ लाख रुपैयाँको लागतमा निर्माण सुरु भएको घर सांसद मण्डलले शिलान्यास गरेका छन् ।

विपन्न सुकुम्बासी परिवारका लागि घर निर्माणको शिलान्यास गर्दै सांसद मण्डलले रु १ करोडमै ३२ परिवारका लागि नमुना घर बन्ने दावी गरे । उनले सुकुम्बासी परिवारप्रती सरकारले अभिभावकत्वको भुमिका निर्वाह गर्दै एकिकृत वस्ती निर्माणको काम सुरु गरेको बताए ।

सांसद मण्डलले विपन्न, भुमिहिन तथा सुकुम्बासी परिवारको दिर्घकालिन समस्या समाधानका लागि सरकार तत्पर रहेको बताए । ‘सांसद विकास कोषको बजेटमा इमान्दारीताका साथ श्रोत साधनको सदुपयोग गरियो भने सवै सम्भव छ भनेर नमुनाको रुपमा घर बनाउने तरखरमा लागेका छौँ ।’ उनले भने ,‘भोलिका दिनमा चाहँदाखेरी थोरै बजेटमा पनि धेरै भन्दा धेरै काम कसरी गर्न सकिन्न भनेर देखिने छ ।’

सांसद मण्डलले लामो समयदेखिको बन्दाबन्दीले जिवन यापनमा समेत कठिनाई उत्पन्न भएका सोही ३२ परिवारलाई घरसँगै रोजगारीसमेत प्रदान गरिने बताए । ‘रोजगारीको अवसर पनि सृजना गर्न जसको घर हो त्यहि परिवारका सदस्यलाई लेबर, मिस्त्रीदेखि सक्ने आवश्यक सवै काम पारिश्रमिकसमेत दिएर गराइन्छ ।’ उनले उनले भने ,‘जसको घर हो उसैले बनाउँदा राम्रो, गुणस्तरी र छिटोछरीतो काम पनि हुन्छ ।’ उनले महामारीका कारण सरकारले जारी गरेको बन्दाबन्दीले केही ढिलाइ भएपनी समयमै काम सकिने विश्वास व्यक्त गरे । उक्त घरहरु असार मसान्त भित्रैमा निर्माण सम्पन्न हुने उपभोक्ता समितिका अध्यक्ष राजेन्द्र कहरले जानकारी दिए ।