विराटनगर, बैशाख २८–सिराहबाट भोक भोकै २ दिन लगाएर आउँदै गरेका १३ जना इट्टा उद्योगमा काम गर्ने मजदुरको सुनसरी स्थित कोशी ब्यारेजबाट उद्धार गरिएको छ । मोरङको कटहरी वडा नं. २ घर भइ सिराहको मथेलेस्वर गाउँपालिका–१० मिर्चैया स्थित बालाजी इट्टा उद्योगमा काम गर्दै आएका उनीहरुलाई कोशी ब्यारेजबाट उद्धार गरिएको हो ।

भोकमरी विरुद्धको साझा अभियान कटहरीका संयोजक मृत्युञ्जयकुमार झाको पहल र कटहरी–२ का वडाध्यक्ष किशोर पाण्डेको समन्वयमा उनीहरुलाई जिप रिजर्भ गरी कटहरी ल्याइएको हो । उद्धार गरि ल्याउन सवारी र त्यसको पासका लागि भोकमरी विरुद्धको साझा अभियान कटहरीले पहल गरेको हो ।

गत चैत ११ गतेदेखी जारी बन्दाबन्दीका कारण इट्टा उद्योगमा काम समेत बन्द भएर भोक भोकै बस्नुपर्ने अवस्था आएपछी डेढ बर्षिया १ बालिका र उनकी आमासहित अन्य ११ जना मजदुर सिराहबाट पैदलै हिँडेर कोशी ब्यारेज आइपुगेका थिए । सिराहबाट भोक भोकै कोशी ब्यारेज सम्म आइपुगेको उनीहरुका आफन्तले जानकारी गराएपछी गाडी पठाएर उद्धार गरि घर सम्म पुर्याइको अभियानका संयोजक झाले जानकारी दिए ।

उनले उद्धार गरि ल्याइएका सवैको कटहरी जनस्वास्थ्य कार्यालयको सहयोगमा आरडिटी परिक्षण गरि अनिवार्य एकान्तबासमा बस्न सुझाव दिँदै घर पठाइएको जानकारी दिए । ‘भाकै प्यासै कोशी ब्यारेज सम्म उहाँहरु आइपुगेको हामीलाई जानकारी प्राप्त भएपछी तत्काल वडासँगको समन्वयमा त्यहाँसम्म गाडी पठाएर उद्धार गरिएको हो ।’ उनले भने,‘सवैको आरडिटि परिक्षण समेत गरियो । रिपोर्ट नेगेटिभ आएपछी अनिवार्य रुपमा होम क्वारेन्टाइना बस्ने सल्लाह दिएर घर पठाएका छौँ ।’

नेकपा प्रदेश कमिटी सदस्यसमेत रहेका स्थानीय समाजसेवी झाका अनुसार उनीहरु सवैलाई कोशी व्यारेज स्थित हेल्थ डेस्कमा ज्वरो परिक्षण गरेर कटहरी ल्याइएको हो ।

उद्धार गरि ल्याएका भन्छन्–मरे बाँचे आफ्नै गाउँमा
कटहरी आइपुगेका मजदुरहरुले आफुहरुको उद्धार गरी ल्याइएकोमा खुशि व्यक्त गरेका छन् । उद्धार गरि ल्याइएका सन्तोष ऋषिदेवले आफुहरु इट्टा उद्योगमा भोकभोकै बस्नुपर्ने अवस्था आएपछी दुई दिन लगाएर कोशी ब्यारेज सम्म आइपुगेको जानकारी दिए । ‘उद्योगमा काम पनि बन्द भयो । अलि अलि भएको पैसासमेत सवै सकिएपछी भोकभोकै अस्ने अवस्था आयो । त्यसै मर्नुभन्दा पैदलै भएपनी घर आउने भनेर त्यहाँबाट हिँड्यौँ ।’ उनले भने,‘कोशी ब्यारेज आइपुेगेर गाउँमा सम्पर्क गरेपछी हामीलाई लिन गाडी पुगेर यहाँ आइपुग्यौँ । अब मरे बाँचे आफ्नै गाउँमा । गाउँ आएपछी भोक प्यास त्यसै हरायो । ’

त्यस्तै उद्धार गरि ल्याइएका सुभाष ऋषिदेवले पनि गाउँ आइपुग्नुनै ठुलो कुरा भएको बताए । ‘अभियानका संयोजक झाको घरमा पुगेर मेरो परिवारले जानकारी गराएपछी उहाँले तत्कालै गाडी पढाएर उद्धार गर्ने बचन दिनुभएको थियो ।’ उनले भने,‘उहाँ जहिल्यै समाजमा अप्ठ्यारो परेकाबेला सहयोगी हुनुहुन्छ । यो महमारीमा हामीलाई घरसम्म ल्याउनु सहयोग गर्नुभएकोमा धेरै धन्यवाद दिन चाहन्छु ।’

यस अघि उदयपुरबाट पनि कटहरीका १२ जनालाई उद्धार गरि ल्याइएको थियो । भोकमरी विरुद्धका साझा अभियानले कटहरीका कुनै पनि परिवार भोकै बस्नुपर्ने अवस्था नआओस भनेर असाहय, अति विपन्न, दैनिक ज्यालादारी मजदुरलगायतलाई राहत रमेत वितरण गर्दै आएको छ । अभियन्ता राजेश बरालले गाउँपालिमा क्षेत्रमा आर्थिक अवस्थाकै कारण चुल्हो बल्न नसकेर हातमुख जोर्न समस्यामा परेकाहरुलाई राहत सहयोग गर्दै आएको जानकारी दिए ।