विराटनगर, बैशाख २७–गण्डकी प्रदेशका सांसद तथा नेकपा कास्कीका अध्यक्ष कृष्ण थापाले कानुनको बर्खिलाप गर्दै दलित समुदायमाथि अपमान गरेकाले कडा भन्दा कडा कारबाही गर्न माग गरिएको छ ।

जातीभेद विरुद्ध विश्व मञ्चका अध्यक्ष तिर्थ विश्वकर्माले शुक्रबार एक विज्ञप्ती प्रकाशित गर्दै सांसद थापालाई कारवाहीको माग गरेका हुन् । संविधान र कानुनलाई पालना गर्ने, मानव अधिकारको रक्षा र सवैखाले बिभेद अन्यका लागि लागिरहन्छु भन्दै मत लिएर विजयी सांसद थापाले सिंगो दलित समुदाय माथि अपमान गर्दै आपत्तिजनक प्रेस विज्ञप्ती जारी गरेकाले कारवाहीका लागि माग गरेको हो ।

्दलित समुदायको समेत मत लिएर गण्डकी प्रदेश सभामा विजयी थापाले जातीय विभेद गर्ने माथि कारवाही गर्न पहलकदमी गर्नुको साटो उल्टो पिडीतलाई जातीय द्वेष फैलाएको, सामाजिक सदभाव धमिल्याउने कार्य गरेको लगायतका आरोप लगाउँदै आपपत्तिजनक अभिव्यक्ति सहितको पे्रस विज्ञप्ती प्रकाशित गरेको भन्दै कारवाहीको माग गरिएको हो ।

‘सांसद थापाले अनुशन्धानकै क्रममा रहेको जातीय विभेद तथा छुवाछुतको घटनालाई तोडमोड गर्न सहयोग पुग्ने, नेपालको संबिधान, जन प्रतिनिधीको सामन्य आचरसंहिता बिरुद्ध मात्र नभई अन्तराष्ट्रिय मानव अधिकारको समेत उल्लंघन गर्दै घृणित कामको घोर भतर््साना गर्दै नीजलाई र घटनाका दोषीहरुलाई कानून बमोजिम हदै सम्मको कारवाहीको नेपाल सरकारसँग माग गर्दछ ।’ विज्ञप्तीमा भनिएको छ ।

पोखरा महानगरपालिका वडा नं. १६ का मोहनकुमार सुनारले वैदेशिक रोजगारीको सिलसिलामा दुवईमा रहेका आफ्ना भाईको पार्थिव शरिर नेपाल ल्याउन नसकेपछि महानगरपालिकाकै लगानीमा निर्माण भएको सार्वजनिक भवनमा काजकिरिया गर्न खोजेका थिए ।

तर, सार्वजनिक स्थलमै काजकिरिया गर्नबाट रोकिएपछि बैशाख १९ गते जनक थापा, देवबहादुर थापा र राम विसी समेतलाई विपक्षी बनाई जिल्ला प्रहरी कार्यालय कास्कीमा मुद्धा दर्ता गराएका थिए । प्रहरीले पिडकलाई पक्राउ गरेपछि सांसद थापाले जातीय सद्भाव भड्किने भन्दै विज्ञप्ती निकालेर पक्राउ परेका आफ्ना कार्यकर्तालाई विना सर्त रिहा गर्न माग गरेका थिए ।