धनगढी, २६ वैशाख-सेती प्रादेशिक अस्पतालमा उपचाररत धनगढीकी कोरोना संक्रमित महिला ३५ दिनपछि निको भएर घर फर्किएकी छन । लगातार दुई पटकसम्म रिपोर्ट नेगेटिभ आएपछि उनलाई अस्पतालबाट आज डिस्चार्ज गरिएको छ ।

३५ दिनदेखि सेती अस्पतालमा उपचाररत धनगढी उप–महानगरपालिका-५ की ३४ वर्षीय महिलाको छ पटकसम्म गरिएको थ्रोट स्वाब परीक्षणमा कोरोना रिपोर्ट पोजेटिभ आएकोमा पछिल्लो दुई पटक गरिएको परीक्षणमा रिपोर्ट नेगेटिभ आए सँगै उनलाई डिस्चार्ज गरिएको कन्सलटान्ट फिजिसियन डाक्टर शेरबहादुर कमरले बताए ।

उनीसँगै भर्ना भएका दुई जना, अगाडि भर्ना भएका एकजना र उनीभन्दा पछाडि भर्ना भएकी एक जना गरी चारजना कोरोना संक्रमित भने सेती अस्पतालबाट यसअघि नै डिस्चार्ज भईसकेका थिए । सुदूरपश्चिम प्रदेशमा देखा परेका पाँचैजना कोरोना संक्रमित ठिक भएर घर फर्किसकेका छन्।

लम्कीचुहा नगरपालिकाका २१ बर्षीय युवक, धनगढी उप–महानगरपालिका-५ का ३४ वर्षीय युवक, कञ्चनपुरको बेदकोट नगरपालिकाका ४० वर्षीय पुरुष र लम्कीचुहा नगरपालिका-१ कि महिला यसअघि नै सेती प्रादेशिक अस्पतालबाट डिस्चार्ज भईसकेका थिए।