काठमाडौं, ४ बैशाख-महानगरीय प्रहरी वृत्त महाराजगञ्जका प्रमुख प्रहरी नायव उपरीक्षक (डीएससपी) उमेल लम्साललाई तान्ने तयारी भएको छ । महाराजगञ्ज प्रहरीले दबंग शैलीमा उत्रिएर डाक्टरमाथिनै लाठी चार्ज गरेको विषय सार्वजनिक भएपछि उनलाई कारबाही स्वरुप महानगरीय प्रहरी कार्यालय (मेट्रो) रानीपोखरी तान्ने तयारी भएको हो ।

बुधबार राति त्रिवि शिक्षण अस्पताल महाराजगञ्जमा कार्यरत ३ जना डाक्टर शम्भु खनाल, तेजप्रसाद साह र विकाश साह माथि प्रहरीले लाठी चार्ज गरेको थियो ।

लाठी चार्ज गर्ने क्रमा डीएसपी सोयम् घटना स्थलमा भइएको पाइएपछि उनलाई तान्ने तयारी भएको रानीपोखरी प्रहरी कार्यालय स्रोतको भनाइ छ । डाक्टरहरु अस्पतालको ड्युटी सकेर साँझ घर फर्कने क्रममा कान्तिबाल अस्पताल पछाडिको ओरालोमा प्रहरीले उनीमाथि चार्ज भएकाे थियाे ।

प्रहरीको लाठीले घाइते भएका डाक्टर शम्मु खनालले समेत प्रहरीको भ्यानमा आफूहरुले नचिने पनि प्रहरी हाकीमनै रहेको शिलापत्रलाई यसअघिनै बताएका थिए ।

घटनाको छानविन गर्न यस अघिनै महानगरीय प्रहरी कार्यालय रानीपोखरीले तीन जनाको नेतृत्वमा छानविन समिति गठन गरेको छ । समितिमा रानीपोखरीका एसएसपी किरण बज्रचार्या, अपराध महाशाखाका एसपी मुकेश सिंह र काठमाडौं प्रहरी परिसरका डीएसपी होविन्द्र बोगटी रहेका छन् । डीएसपी लम्सालमाथि परिस्थितिको मूल्यांक नै नगरी आक्रामाक शैलीमा काम गरेर चर्चामा आउन खोजेको भन्दै चौतर्फि विरोध भएको छ ।