बुटवल, २४ वैशाख-रुपन्देहीको देवदहमा गाई काटेर खाएको आरोपमा प्रहरीले ३ जनालाई पक्राउ गरेको छ । इलाका प्रहरी कार्यालय बुटवलले देवदह नगरपालिका- १० भुलहीबाट ३ जनालाई पक्राउ गरेको हो ।

पक्राउ पर्नेमा रामप्रसाद पराजुली, सुकबहादुर परीयार र प्रदीप पुन रहेका छन् । ज्ञानबहादुर केसीले पाल्न दिएको गाई काटेर खाएको जाहेरीका आधारमा ३ जनालाई पक्राउ गरिएको ईलाका प्रहरी कार्यालय बुटवलका प्रहरी नायव उपरीक्षक भीमलाल भट्टराईले जानाकारी दिए । उनीहरूमाथि थप अनुसन्धान भइरहेको उनले बताए ।

स्थानीय केसीले राम प्रसाद पराजुलीलाई पाल्न दिएको माउ बाच्छी गाई हराएपछि खोज्दै जाँदा काटेर गाडेको अवस्थामा मंगलबार रोहीणी सामुदायिक बनमा फेला परेको थियो । हराएको भनिएको गाई र बाच्छी खोज्दै जाँदा एउटा  खाडलमा गाईको माउ र अर्को खाडलमा बाच्छीको टाउको, खुट्टा र भूँडी फेला परेको थियो । मुलुकी अपराध संहिता ऐन २०७४ को परिच्छेद २७ दफा २८९ बमोजीम कसुर गर्ने व्यक्तिलाई ३ वर्ष सम्म कैदको व्यवस्था गरीएको छ ।