जनकपुर, माघ २४–अभिव्यक्तिका कारण पटकपटक विवादमा पर्दै आएका प्रदेश २ का मुख्यमन्त्री लालबाबु राउतले केटीले केटाको मुखमा एसिड फाल्ने कुरो गरेर फेरि विवादमा आएका छन् । मुख्यमन्त्रीको एसिडसम्बन्धी वक्तव्य सामाजिक सञ्जलमा भाइरल भइरहेको छ । ‘बेटी पढाऔँ, बेटी बचाऔँ’ अभियानको नाममा प्रदेश २ सरकारले छोरी शिक्षा बीमाको रकम ३ लाख र्पुयाएपछि प्रदेश सरकारको चारैतिर प्रशंसा भइरहेको छ ।

‘बेटी पढाऔँ, बेटी बचाऔँ’ अभियानबाट उत्साहित बनेका मुख्यमन्त्रीले बिहीबार आयोजित एक कार्यक्रममा आफ्नै कार्यकालमा छोरीलाई छोराको मुखमा एसिड खन्याउन सक्ने हैसियतको बनाउने घोषणा गरे । मुख्यमन्त्री राउतले मैथिली भाषामा भनेका छन्, ‘तपाईंहरू छोरीका बारेमा सोच्दै हुनुहुन्छ । हामी पनि पहिलेदेखि नै छोरीको विषयमा सोचिरहेका छौँ । छोरीलाई यति कन्फिडेन्ट, क्यापेबल र यति लडाकू बनाउनु छ मेरो कार्यकालमा कि छोरीले अब छोराको मुखमा एसिड खन्याउँछन्, यस्तो मेरो सोच छ ।’