काठमाडौं, २४ वैशाख-सत्तारूढ दल नेपाल कम्युनिष्ट पार्टी (नेकपा)को सचिवलाय बैठकमा चर्काचर्की भएको छ । चर्काचर्की भएपछि प्रधानमन्त्री एवं अध्यक्ष केपी शर्मा ओली बैठकबाट बाहिरिएका छन् ।

बैठकमा नेताहरूबीच चर्काचर्की हुन थालेपछि प्रधानमन्त्री ओली शयनकक्षतर्फ लागेको बालुवाटार स्रोतले बतायो । प्रधानमन्त्री ओली एक पद एक मुख्य जिम्मेवारीको विपक्षमा रहेका छन् तर बहुमत सचिवालय सदस्यहरू त्यसको कार्यान्वयन गर्ने पक्षमा छन् ।

प्रक्रिया पूरा नगरी राजनीतिक दल र संवैधानिक परिषद्सम्बन्धी दुई अध्यादेश ल्याएपछि ओली घेराउमा परका छन् । विवादका कारण नेकपाले २५ वैशाखमा स्थायी कमिटीको बैठक बोलाएको छ । स्थायी कमिटी बैठकका एजेण्डा के के हुने भनेर आज सचिवालयले निर्णय गर्ने बताइ तापनि विवाद झन बढेको छ ।

नेकपाको सचिवालय बैठक २० वैशाखमा पनि बसेको थियो । उक्त बैठकमा विवाद मिलेको बताए पनि दुई दिनपछि पुनः विवाद सुरु भएको छ । विवादका बीच आज पुन: सचिवालय बैठक बसेको छ ।

नेकपाको ९ जनाको सचिवालयमा २० गतेको बैठकमा ओली बहुमतमा थिए भने प्रचण्ड नेपाल समूह अल्पमतमा । तर, आज बिहान खुमलटार पुगेर वामदेव गौतमले आफू ओली समूहमा नगएको बताएको समाचार बाहिरिएका छन् ।