काठमाडौं, २२ वैशाख-कोरोना भाइरस (कोभिड १९) का कारण विद्यालय बन्द भयो । लकडाउनका कारण विद्यार्थी शिक्षक घरबाट बाहिर निस्कन पाएका छैनन् । लकडाउन भएको १ महिनाभन्दा बढी भयो ।

अब लकडाउन लम्बिए के गर्ने ? लकडाउन कहिलेसम्म जान्छ थाहा छैन । त्यसैले लकडाउनको समयमा विद्यालय बन्द भए पनि विद्यार्थीको सिकाइ अवरुद्ध नगर्ने उद्देश्यले बूढानीलकण्ठस्थित भ्याली पब्लिक माध्यमिक विद्यालयले रचनात्मक र सिर्जनात्मक कामहरू गरिरहेको छ ।

विद्यालयले परीक्षाको नतिजा १२ वैशाखमा अनलाइनबाट नै प्रकाशित गरेको छ । लकडाउन सुरू भएको केही दिनभित्रमा नै एसईई तयारी गरिरहेका विद्यार्थीहरूका लागि अनलाइन कक्षाहरू नियमित रूपमा सञ्चालन गरिरहेको विद्यालयका प्रधानाध्यापक कृष्णप्रसाद अधिकारीले जानकारी दिए ।

‘नर्सरीदेखि कक्षा १० सम्म अध्ययन गर्ने विद्यार्थीलाई हरेक दिन नियमित रूपमा अनलाइन कक्षाहरू सञ्चालन गर्दै आएका छौँ,’ उनले भने, ‘ विद्यालयले कक्षा शिक्षक र विषय शिक्षकहरूले नियमित रूपमा अभिभावकहरूसँग फोनमा संवाद गरी विद्यार्थीहरूलाई घरायसी एवम् सिर्जनात्मक काममा लाग्न प्रेरित गरिरहेको छ ।’

विद्यार्थीहरूलाई खाना पकाउने, तरकारी केलाउने, घरको सरसफाइ गर्ने, आफ्ना लुगा आफै धुने, आफ्नो बिस्तारा आफैँ मिलाउने, अभिभावकहरूलाई माया र सम्मान गर्ने, आफन्तहरूसँग फोनमा कुराकानी गर्ने, कोरोनाका बारेमा जानकारी गराउने र सुरक्षित रहने उपायहरू बताउनेजस्ता व्यावहारिक ज्ञान बढाउन प्रेरित गरिरहेको उनले बताए ।

विद्यालयले करेसाबारी वा बारीमा तरकारी रोप्ने, गोड्ने, फलफूल बिरूवाहरू रोप्ने, सड्ने र नसड्ने फोहोर छुट्याउनेजस्ता काम गर्न लगाई विद्यार्थीहरूको सिर्जनात्मक क्षमता अभिवृद्धि गर्न पनि पहल गरिरहेको छ ।

विद्यालयले अनलाइनमार्फत नै कविता लेखन, निबन्ध लेखन, कथा लेखन, चित्रकलाका साथै कोरोना कहरसँग सम्बन्धित विभिन्न रचनाहरू तयार गर्न लगाई पुरस्कृत गर्ने योजना बनाएको छ ।

अनलाइनबाट विद्यार्थी भर्ना गर्ने, शिक्षकहरूसँग नियमित रूपमा बैठक बस्ने, शिक्षकहरूलाई तालिम प्रदान गर्ने, दैनिक पाठयोजना बनाउने, विद्यालयलाई पूर्ण रूपमा आधुनिक प्रविधिसँग जोड्ने, अभिभावकहरूलाई अभिभावकीय शिक्षा प्रदान गर्ने, गरेर–हेररे र खेलेर सिक्न सक्ने विधिको उपयोग विद्यलयले गरेको छ ।