धनगढी, २१ वैशाख-कोरोना भाइरसबाट संक्रमित भएपछि सेती प्रादेशिक अस्पताल धनगढीमा भर्ना भएका ५ जनामध्ये ४ जना निको भएर घर फर्किसकेका छन । तर, परिवारकै सदस्यबाट संक्रमण सरेर २८ दिनअघि अस्पताल भर्ना भएकी धनगढीकी १ महिलाको भने लगातार पोजिटिभ रिपोर्ट आइरहेको छ ।

‘आज पनि पाजिटिभ रिपोर्ट आयो आएको छ भन्छन्’ उनले भनिन, ‘खै के भएको हो, लगातार पोजिटिभ रिपोर्ट आइरहेको छ ।’ उनको छैठौँ पटक थ्रोट स्वाब रिपोर्ट पनि पोजिटिभ देखिएको अस्पतालका प्रवक्ता जगदिश जोशीले बताए ।

‘एक्लै हुँदा बेलाबेला न्यास्रो त लाग्छ, मनमा अनेक कुरा पनि खेलिरहन्छन्,’ उनले भनिन्, ‘आफूसँगैका सबै निको भएर घर गएपछि उत्साह बढेको थियो । तर, आफ्नो भने निरन्तर रिपोर्ट पोजिटिभ आइरहेको छ ।’ ढिलै भए पनि आफू पनि निको भएर चाँडै घर फर्किने विश्वासमा रहेको उनले बताइन् ।

संक्रमणको हिस्ट्री अरु बिरामीको भन्दा बैग्लै भएकाले उनको पीडा पनि अरुभन्दा बढी छ । दुबईबाट घर आएका उनका देबरलाई कोरोना भाइरसको संक्रमण देखिएको थियो । ३० दिन अस्पतालमा बसेर निको भएपछि उनी भने डिस्चार्ज भएर यसअघि नै घर फर्किसकेका छन् ।