अस्पतालका प्रमुख मेडिकल सुपरिटेन्डेन्ट डा. मदनकुमार उपाध्यायले रौतहटका युवकमा थप परीक्षण गर्नु परेकाले आइसोलेसन वार्डमा राखिएको बताए । अस्पताल स्रोतका अनुसार डिस्चार्ज भएका ती युवकको थ्रोट स्वाब पुनः जाँच गर्दा पोजिटिभ देखिएकाे छ ।

‘डिस्चार्ज भएको २ दिनपछि राष्ट्रिय जनस्वास्थ्य प्रयोगशालाबाट जानकारी आयो कि रौतहटका युवकको फेरि थ्रोट स्वाब संकलन गरी पठाउनू,’ नाम उल्लेख नगर्ने सर्तमा स्रोत भन्छ, ‘स्वाब लिन उनको गाउँमै पुगेको टोलीले ती युवकसहित परिवारका १३ जनाको स्वाब लिएको थियो ।’

स्रोतका अनुसार परिवारका अन्य सदस्यको रिपोर्ट नेगेटिभ आएको छ । नारायणी अस्पतालका मेडिकल सुपरिटेन्डेन्ट उपाध्यायले भने युवकको स्वास्थ्यमा समस्या देखिएपछि उपचारका लागि ल्याइएको जानकारी दिए ।

३ भारतीय मुस्लिम धर्म प्रचारक र ती युवक गत आइतबार निको भएर नारायणी अस्पतालबाट डिस्चार्ज भएका थिए । अस्पतालका अनुसार वैशाख १० र १३ गते कोरोना नेगेटिभ देखिएपछि उनीहरुलाई १४ वैशाखमा डिस्चार्ज गरिएको थियो ।

डिस्चार्ज हुने खबर पाएपछि युवकलाई लिन उनका आफन्त एम्बुलेन्स लिएर नारायणी अस्पताल आएका थिए । डिस्चार्जपछि ती युवक १ सातादेखि घरमा आफन्तसँग बस्दै आएका थिए ।