एजेन्सी, बैशाख २१ -उत्तर र दक्षिण कोरियाका सेनाबीच सीमा क्षेत्रमा गोली हानाहान भएको छ । दुई कोरियालाई छुट्ट्याउने असैन्यकृत क्षेत्रमा दुई कोरियाका सेनाबीच गोली हानाहान भएको हो ।

दक्षिण कोरियाली सेनाले उत्तर कोरियाबाट चलेका थुप्रै गोली एउटा सुरक्षा पोस्टमा लागेको जनाएको छ । त्यसपछि आफूहरूले चेतावनी दिएको र पछि गोली हानाहान सुरु भएको दक्षिण कोरियाले जनाएको छ। घटनामा कुनै हताहती भने नभएको बताइएको छ।

पछिल्लो पाँच वर्षयता पहिलो पटक उत्तर कोरियाली सैनिकहरूले दक्षिण कोरियातिर सीधै गोली चलाएको विवरणमा जनाइएको छ। सुरक्षा व्यवस्था एकदमै कडा रहने असैनिकीकृत क्षेत्रलाई शान्ति क्षेत्रमा परिणत गराउने सोलस्थित दक्षिण कोरियाली सरकारको दुई वर्षयता जारी प्रयासबीच गोली हानाहानको घटना भएको हो ।

करिब तीन सातामा उत्तर कोरियाली नेता किम जोङ उन सार्वजनिक रूपमा देखिएको २४ घण्टापछि नै उत्तर र दक्षिण कोरियाली सेनाबीच गोली हानाहानको घटना भएको हो । दोस्रो विश्वयुद्ध अन्त्यसँगै विभाजित बनेका दुई कोरिया प्राविधिक रूपमा अझै युद्धको अवस्थामा छन् ।