जसपालाई प्रचण्ड-नेपाल समूहको प्रस्ताव : ओलीको प्रतिगमन सच्चियो, अब मिलेर जाऔँ - News Birat

जसपालाई प्रचण्ड-नेपाल समूहको प्रस्ताव : ओलीको प्रतिगमन सच्चियो, अब मिलेर जाऔँ

न्यूज विराट

नेकपाको प्रचण्ड-नेपाल समूहले जनता समाजवादी पार्टी (जसपा) नेपाललाई मिलेर सरकार बनाउने प्रस्ताव गरेका छन् । सर्वोच्च अदालतले प्रतिनिधिसभा पुनर्स्थापना गरेपछि सत्ता समीकरणका लागि नेकपाको प्रचण्ड-नेपाल समूहले बिहीबार जसपाका शीर्ष नेताहरूसँग छलफल गरेको हो । छलफलमा प्रचण्ड-नेपाल समूहका अध्यक्ष पुष्पकमल दाहाल प्रचण्ड र माधवकुमार नेपालले मिलेर जाने प्रस्ताव जसपाका नेताहरूलाई गरेका हुन् ।

अध्यक्ष प्रचण्डले प्रधानमन्त्री केपी शर्मा ओलीले विघटन गरेको संसद् अदालतबाट पुनर्स्थापना भएको र अब मिलेर सरकार बनाएर जाने अघि बढ्ने प्रस्ताव गरेका हुन् । प्रचण्डले ओलीको प्रतिगमन सच्चिएकाले अब मिलेर सरकार बनाएर अघि बढ्नु पर्ने बताएका हुन् ।

तर, जसपाका शीर्ष नेताहरूले भने आफूहरूले अघि नै मिलेर जाने प्रस्तावबारे निर्णयमा पुग्न नसक्ने जवाफ प्रचण्ड-नेपाललाई दिएका छन् । उनीहरूले ओलीको प्रतिगमन सच्चिएपनि अघि नै मिलेर अघि बढ्न सक्ने स्थिति बनिनसकेको बताएका थिए ।

‘प्रचण्डजीहरूले ओलीको प्रतिगमन अदालतले सच्यायो । अब तपाईं हामी  मिलेर जानुपर्छ भन्नुभयो,’ बैठकमा सहभागी जसपाका एक नेताले भने, ‘तर हामीले ओलीको प्रगितमन सच्चिएपनि हाम्रा पुराना माग सम्बोधन भएका छैनन्, तपाईंहरूको प्रतिगमन त कायमै छ भनेर जवाफ दियौं । ’

जसपाका नेताहरूले संविधान ट्रयाकमा आएपनि आफूहरूका माग सम्बोधन भने अहिलेसम्म नभएकाले मिलेर जाने विषयमा पार्टीभित्र थप छलफल गरेपछि मात्रै निर्णय लिन सकिने बताएका थिए ।

भेटमा प्रचण्ड-नेपाल समूहका अध्यक्षद्वय प्रचण्ड र माधवकुमार नेता तथा जसपाका तर्फबाट अध्यक्ष महन्थ ठाकुर, राजेन्द्र महतो र राजेन्द्र श्रेष्ठ सहभागी थिए ।

संसद् पुनर्स्थापना भएपछि नेकपा प्रचण्ड-नेपाल समूहले सत्ता समीकरणका विषयमा कांग्रेस सभापति शेरबहादुर देउवासँग् छलफल गरेको थियो । देउवालाई भेट्न बुधबार दिउँसो बूढानीलकण्ठ पुगेका प्रचण्ड र नेपालले मिलेर अघि बढ्ने प्रस्ताव गरेका थिए । तर, देउवाले यसबारे पार्टीभित्र छलफल गरेर मात्रै निर्णयमा पुग्न सकिने जवाफ दिएका थिए ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles