एजेन्सी, बैशाख १९-कोरोना भाइरसको उत्पत्तिका विषयलाई लिएर अमेरिका र चीनबीच आरोप प्रत्यारोप चलिरहेका बेला अमेरिकी गुप्तचर अधिकारीहरुले कोरोना भाइरस मानव निर्मित वा आनुवांशिक रुपमा परिवर्तन गरी बनाइएको भाइरस नरहेको पुष्टि भएको बताएका छन् ।

यूएस इन्टेलिजेन्स कम्युनिटी (यूएसआइसी) ले भाइरस मानव निर्मित नरहेको बताएको हो । यद्यपि यसको उद्गम थलो वा उत्पती कहाँ भएको थियो भन्ने बारे अनुसन्धान जारी रहेको बताइएको छ ।

कम्युनिटीले उपलब्ध प्रमाण र वैज्ञानिक सहमतिका हिसाबले कोरोना भाइरस कुनै प्रयोगशालामा आनुवांशिक परिवर्तन गरी नबनाइएको जनाएको छ ।

आफूहरुले भाइरसको संक्रमण मानवमा जनावर हुँदै आएको वा प्रयोगशालामा भएको दुर्घटनाका कारण फैलिएको भन्नेबारे अनुसन्धान गरेको बताएका छन् ।

अमेरिकी राष्ट्रपति डोनाल्ड ट्रम्पले कोरोना भाइरस वुहानस्थित प्रयोशालाबाट आएको आफूसँग प्रमाण रहेको दाबी गर्दै आएका छन् । चीनले भने अमेरिकाको आरोपको खण्डन गरिसकेको छ । चीनले भाइरसको संक्रमण फैलिन नदिन अमेरिकाले गरेको काम पर्याप्त नभएको बताएको छ ।