काठमाडौं, १५ वैशाख-गृह मन्त्रालयले लकडाउनलाई थप कडाइ गर्ने भएको छ । सवारी साधनमा हुलमुलका साथ यात्रा गर्दा कोरोना संक्रमणले थप जटिलता निम्त्याउन सक्ने भन्दै लकडाउन कडाइ गर्न निर्देशन दिएको हो ।

गृह मन्त्रालयले सबै जिल्ला प्रशासन कार्यालयहरूलाई आज परिपत्र गर्दै पासविनाका कुनै पनि सवारी साधनलाई आवतजावतमा रोक लगाउन निर्देशन दिएको गृह स्रोतको भनाइ छ ।

बिचल्लीमा परेका मजदुर र सर्वसाधारणलाई उद्धारका लागि केही दिन सवारी साधनलाई साँझको समयमा अनौपचारिक रूपमा केही खुकुलो गराइएको गृह मन्त्रालयको भनाइ छ ।

अब अलपत्र परेका तथा बिचल्लीमा परेका अधिकांशको उद्धार भइसकेको ठहर गर्दै आजबाट सवारी साधन सञ्चालनमा रोक लगाउनुका साथै आवतजावतामा समेत कडाइ गरिएको गृहको भनाइ छ ।