तेह्रथुम, संखुवासभा र ताप्लेजुङको सीमावर्ती क्षेत्रमा फैलिएको तीनजुरे–मिल्के–जलजले (टीएमजे)को गुराँसे वन प्रदेश-१ को महत्त्वपूर्ण पर्यटकीय गन्तव्यमा पर्दछ । यस क्षेत्रमा गुराँस फुल्न सुरु भए पनि लकडाउनका कारण वन क्षेत्र सुनसान छ ।

५ सय ८५ वर्ग किलोमिटर क्षेत्रफलमा फैलिएको तीनजुरे, मिल्के र जलजले क्षेत्रमा गुराँस फुल्ने सिजन फागुनदेखि जेठसम्म हो । सो क्षेत्रमा यतिबेला थरीथरीका गुराँसले डाँडाकाँडा भरिभराउ छन् । मनै लोभ्याउने गरी राताम्मे गुराँस फुले पनि कोरोना भाइरसको संक्रमणकाे न्यूनीकरणका लागि सरकारले लकडाउन गरेपछि गुराँसे वन सुनसान बनेकाे हाे ।

गएको वर्षभन्दा यस वर्ष धेरै थरीका गुराँस फुलेका छन् । गत वर्ष मात्रै गुराँस फुल्ने सिजनमा करिब ५० हजार पर्यटकहरू भित्रिएको भए पनि अहिले कोही नआएको स्थानीयले सोना तामाङले बताए ।

विश्वमा पाइने ३३ प्रजातिका गुराँसमध्ये २८ प्रजातिका गुराँस एकै ठाउँमा पाइनुले टीएमजे क्षेत्रलाई गुराँसको राजधानीसमेत भन्ने गरिएको छ । गुराँस फुलेको समयमा अघिल्लो वर्षसम्म दैनिक २ हजारदेखि ५ हजारसम्म आन्तरिक र बाह्य पर्यटकहरू आउने गरेका थिए ।

यस क्षेत्रका चौकी, मंगलबारे, गुफापोखरी, सुकेपोखरी, घुर्बिसे पञ्चमीलगायत आधा दर्जन बढी बजारहरू गुराँसे पर्यटनमा निर्भर छन् । तर, लकडाउनका कारण पर्यटकहरू नआएपछि गुराँसे पर्यटनले धानेको यो क्षेत्रका व्यवसायी मारमा परेको स्थानीय होटल व्यवसायी यज्ञ कार्कीले बताए ।

टीएमजे क्षेत्रमा विशेषगरी मंसिरदेखि माघसम्म हिउँ खेल्न र फागुनदेखि वैशाख, जेठसम्म गुराँस हेर्न पर्यटक आउने गर्छन् । गुराँसे वन साथै आसपासका भौगोलिक सौन्दर्यले भरिपूर्ण यो क्षेत्र पर्यटकको रोजाइमा पर्छ । तर, लकडाउका कारण पर्यटक नआएपछि यहाँको पर्यटन संकटमा पर्न थालेको छ ।