काठमाडौं, १२ वैशाख-राष्ट्रियसभाको दिगो विकास समितिले कोरोना महामारी नियन्त्रणमा मात्रै ध्यान केन्द्रित गर्न सरकारलाई निर्देशन दिएको छ । विश्व महामारीका रूपमा फैलिएको कोरोना भाइरस (कोभिड-१९) संक्रमणको जोखिम रहेका बेला महामारी नियन्त्रणका लागि अन्यन्त्र ध्यान नदिन समितिले निर्देशन दिएको हो ।

अहिलेको समयमा सबै एकजुट भएर काम गर्नुबाहेक अन्य विकल्प नभएको समिति सभापति तारादेवी भट्टले बताइन् । सरकारको ध्यान कोभिड-१९ मा मात्रै हुनुपर्ने उनले बताइन् । संविधान र जनताको इच्छाविपरीत जाने अधिकार कसैलाई पनि नभएको उल्लेख गर्दै समिति सभापति भट्टले सरकारलाई कोरोना नियन्त्रणमा मात्रै ध्यान केन्द्रित गर्न निर्देशन दिइन ।

‘एकजुट भएर काम गर्ने बेला हो । यसको अरु विकल्प नै छैन् । एउटा मात्रै हाम्रो फोकस कोभिड-१९ हो । यस्तो बेलामा गुट, टुटफुटको अवस्था हुनु हुँदैन् भन्ने ध्यानाकर्षण गराउँछु,’ उनले भनिन्, ‘यस्तो बेलामा एकजुट हुनैपर्छ । संविधानको मर्म र जनताको इच्छाविपरीत जाने अधिकार कसैलाई पनि छैन भन्ने कुरामा सरकारको ध्यानाकर्षण पनि गराउँछु ।’