सुर्खेतको वीरेन्द्रनगर नगरपालिकाले कोरोना भाइरस (कोभिड(१९) कारणले लकडाउनमा परेका अति विपन्न, बेखर्ची र मजदुरलाई राहत दिनका लागि टोल फ्रि नम्बर सञ्चालनमा ल्याएको छ । नगरपालिकाले दाेस्राे चरणको राहतको घोषणा गर्दै अति विपन्न, बेखर्ची र मजदुरलाई राहत दिनका १०१ नम्बरको टोल फ्रि नम्बर सञ्चालनमा ल्याएको हो ।

कोरोना भाइरसका कारण समस्यामा परेका नागरिकले १०१ नम्बरमा आफ्ना समस्या, गुनासा र सुझाव रेकर्ड गराउन सक्ने नगरपालिकाकी उपप्रमुख मोहनमाया ढकालले जानकारी दिइन् । ‘पैसा नलाग्ने टोल फ्रि नम्बर १०१ सञ्चालनमा ल्याएका छौँ,’ उनले भनिन्, ‘कोरोना भाइरसका कारण परेको समस्याका बारेमा जानकारी गराउन सक्नेछन् ।’

यस्तै, वीरेन्द्रनगर नगरपालिकाका स्थायी बासिन्दा जिल्ला बाहिर वा अन्य ठाउँमा रहेको र हालको अवस्थाको विषयमा जानकारी दिन नगरपालिकाले आग्रहसमेत गरेको छ ।