एजन्सी, बैशाख ७संयुक्त राज्य अमेरिका र क्यानडाबीचको सीमा अझै एक महिना बन्द हुने भएको छ । क्यानडाका प्रधानमन्त्री जस्टिन ट्रूडाले दुई देशबीचको सीमा अझै एक महिना बन्द रहने जानकारी दिएका हुन् ।

कोरोना भाइरस संक्रमण फैलिएपछि दुई देशबीचको सीमा गत महिनादेखि नै बन्द रहेको छ । यो समयमा अत्यावश्यक सेवा प्रदायक व्यक्ति तथा ढुवानी सेवा बाहेकलाई सीमा क्षेत्रबाट प्रवेश दिइएको छैन । अत्यावश्यक सेवा आपूर्ति गर्ने ट्रक, विमान, रेल तथा पानी जहाजहरु भने रोकिएको छैन ।

अमेरिकी रक्षा मन्त्रालय पेन्टागनले आन्तरिक तथा बाह्य यात्रा प्रतिबन्ध ३० जुनसम्म लम्ब्याउने घोषणा गरेपछि क्यानडाले पनि एक महिना सीमा बन्द राख्ने निर्णय गरेको हो । अमेरिकाले देश बाहिर सैनिकको तैनाथी तथा बाहिर तैनाथ भएकाहरुलाई स्वदेश फिर्ता हुन समेत ३० जुनसम्म प्रतिबन्ध लगाएको छ ।