काठमाडौं, फागुन २०–उच्च अदालत, बिराटनगरले आफूलाई थुनामा पठाउने आदेश दिने छनक पाएपछि फरार भएका सिद्धबाबा भनिने कृष्णबहादुर गिरीले आत्मसमर्पण गरेका छन् । आफ्नै अनुयायीमाथि जबर्जस्ती करणी गरेको आरोप लागेका गिरीले जिल्ला अदालत, सुनसरीमा मंगलबार आत्मसमर्पण गरेका हुन् ।

उनलाई उच्च अदालतले ९ माघमा पुर्पक्षका लागि थुनामा पठाउने आदेश दिएको थियो । आदेशअनुसार उनलाई कारागार चलान गर्ने तयारी भइरहेको सुनसरी प्रहरीका एक अधिकृतले बताए ।

उच्च अदालत विराटनगरमा मुद्दाको बहस हुँदै गर्दा आफ्नो विपक्षमा फैसला आउने छनक पाएपछि उनी भारततिर फारार बनेका थिए । यसअघि १६ मंसिरमा जिल्ला अदालत, सुनसरीले उनलाई ३ लाख रुपैयाँ धरौटीमा छाड्न आदेश दिएपछि सो आदेशविरुद्ध सरकारी वकिलको कार्यालय उच्च अदालत, विराटनगर पुगेको थियो ।