विराटनगर, बैशाख ५–मोरङको कटहरी गाउँपालिकामा भोकमरीविरुद्ध साझा अभियानको सुरुवात गरिएको छ । कटहरी स्थित विभिन्न संघ संस्थाको सहकार्यमा गाउँपालिकाका कोही पनि जनतालाई भोकै मर्न नदिने अभियान सुरु गरिएको हो ।

लक डाउनका कारण दैनिक ज्यालादारी काम गदै आएका मजदुर परिवारलाई भोक भोकै बस्ने अवस्था आउन नदिन अभियान सुरु गरिएको नेपाल कम्युनिष्ट पार्टी (नेकप) १ नं. प्रदेश कमिटि सदस्य मृत्युज्यकुमार झाले जानकारी दिए ।

‘लक डाउनका कारण धेरै परिवारको घरमा चुल्हो बल्न सकेको छैन । यस गाउँपालिकामा कसैलाई पनि भोकै बस्ने अवस्था नआओस भनेर अभियान सुरु गरेका हौँ ।’ उनले भने,‘मानव सहयोगि हातहरु लगायतका संस्थाहरुको सहयोगमा आज मात्र थुप्रै परिवारलाई राहतस्वरुप खाद्य सामाग्री उपलब्ध गराइएको छ ।’

शुक्रबार कटहरी वडा नं. २ का गरीब , असाहय, अपांग, एकल परीवार र स्थानीय सरकारबाट नपाएकाहरुलाई राहत वितरण गरिएको भोकमरी विरुद्ध साझा अभियानका स्वयंसेवक परिचालन समितिका संयोजक समेत रहेका नेता झाले जानकारी दिए ।

उनले ५० जना स्वयंसेवक परिचालन गरि आर्थिक अवस्थाकै कारण चुल्हो बल्न नसकेका परिवारको खोजि गरि राहत वितरण गरिएको बताए । यो अभियान लक डाउन अवधिभर जारी राख्ने र सो क्षेत्रका कुनै पनि परिवारलाई भोको बस्न नदिने नेता झाले दावी गरे ।