काठमाडौं, ५ वैशाख-कीर्तिपुर नगरपालिकाले कीर्तिपुरस्थित त्रिभुवन विश्वविद्यालयमा अध्यनरत विद्यार्थीलाई राहत सामग्री उपलब्ध गराएको छ ।नगरपालिकाले शुक्रबार साे विश्वविद्यालयमा अध्ययनरत करिब ५ सय विद्यार्थीलाई अत्यावश्यक खाद्य सामग्री उपलब्ध गराएको हो ।

कोरोना भाइरस (कोभिड–१९)को संक्रमणको रोकथामका लागि देभभर लकडाउन गरिएपछि विद्यार्थीलाई खाद्य सामग्री अभाव नहोस् भन्ने उद्देश्यले राहत वितरण गरिएको कीर्तिपुर नगरपालिका-९ का अध्यक्ष एवं कीर्तिपुर नगरपालिका विपद व्यवस्थापन समितिका संयोजक गंगाराम महर्जनले बताए ।

संयोजक महर्जनले कुनै पनि विद्यार्थीलाई भोकै बस्न नपरोस् भन्ने उद्देश्यले राहत उपलब्ध गराएको बताए । उनले कीर्तिपुरमा बसोबास गर्ने स्थानीय बासिन्दा र विद्यार्थी सबैको विवरण आउने क्रममा नै रहेको र जसलाई समस्या परेको छ सबैलई राहत उपलब्ध गराउने उनले बताए ।

विद्यार्थीलाई राहत वितरण गर्ने कार्यक्रममा त्रिभुवन विश्व विद्यालयका प्राचार्य कृष्ण प्रसाद आचार्यले सबै विद्यार्थीलाई राहत पुगोस् भन्ने उद्देश्यले नगरपालिकाको सहयोगमा राहत वितरण गरिएको बताए । उनले विश्व विद्यालयमा अध्यनरत करिब ५ सय जनाले राहत पाएको जानकारी पनि दिए ।

नगरपालिकाले विद्यार्थीलाई १० किलो चामल, दाल, तेल, नुन, आलुलगायतका खाद्य सामग्री उपलब्ध गराएको छ । कीर्तिपुर नगरपालिकामा बसोबास गर्ने जुनसुकै विद्यालय तथा क्याम्पसमा अध्ययन गर्ने विद्यार्थीलाई समस्या भए खाद्यान्न उपलब्ध गराउने नीति लिएकाले समस्या भए सम्पर्क गर्नसमेत नगरपालिकाले आग्रह गरेको छ ।