काठमाडौं, ३ वैशाख-कोरोना भाइरस (कोभिड-१९) संक्रमण नियन्त्रण तथा रोकथामको लागि लागू भएको लकडाउनको अवधीमा पास लिएर गुड्ने सवारी साधनले पासको दुरुपयोग पनि गरेको पाइएको छ ।

लकडाउन अवधिमा पास लिएरसमेत धेरै संख्यामा सवारी साधन गुड्ने गरेकाले जिल्ला प्रशासन कार्यालय ले कडाइ गरेको छ । जिल्ला प्रशासन कार्यालय काठमाडौंले मृत्य संस्कारमा जाने व्यक्तिबाहेकलाई पास नदिने जनाएको छ ।

पासको दुरुपयोग गरी लकडाउनको उल्लंघन हुन अवस्था सिर्जना भएपछि वैशाख ३ गतेदेखि परिवारका सदस्यको मृत्यु संस्कारमा जाने व्यक्तिहरूलाई बाहेक अन्य प्रयोजनका लागि सवारी पास जारी नहुने प्रशासनले सूचना जारी गरी बताएको छ ।

प्रशासनले लकडाउनमा अत्यावश्यकीय सवारी साधन सञ्चालनका लागि पास वितरण गर्दै आएको थियो । गृह मन्त्रालयले मंगलबारदेखि अनलाइनमार्फत ई–पास लिन सक्ने व्यवस्था गरेपछि अत्याधिक माग बढेको र यसले लकडाउनको उल्लंघन हुनसक्ने भन्दै मृत्यु संस्कारमा सहभागि हुन बाहेकका लागि पास वितरण नगर्ने निर्णय गरेको हो ।