धनगढी, फागुन २०–सरकारसँग १४ बुँदे माग राख्दै आन्दोलनरत थरुहट र थारुवान राष्ट्रिय मोर्चाले सरकारलाई दबाब दिन आज र भोली कञ्चनपुर र कैलाली सहित तराईका जिल्लामा आमहड्तालको घोषणा गरेको छ ।

जिल्ला प्रहरी कार्यालय कञ्चनपुर र कैलालीका अनुसार अहिले बन्दको आशिंका प्रभाव देखिएको छ । महेन्द्रनगर, धनगढी सहित विभिन्न क्षेत्रमा बजार आशिंक रुपमा खुलेको छ । अत्यावश्यक सेवा बाहेक यातायात, बजार, विद्यालय सबै बन्द गरिएको छ । ‘आमहड्तालको क्रममा कलकारखाना, उद्योगधन्दा, व्यापार व्यवसाय, शिक्षण संस्था लगायत यातायातका साधन पूर्ण रुपमा बन्द छन् ।

सोमवार बेलुका कञ्चनपुरको बेदकोट नगरपालिका सिसैयाबाट आन्दोलनरत पक्षका एक जनालाई प्रहरीले नियन्त्रणमा लिएको छ । मसाल जुलुश निकाल्ने क्रममा सिसैयाका २२ वर्षीय सञ्जय रानालाई नियन्त्रणमा लिइएको डिएसपी रविन्द्र पौडेलले बताए । थरुहट÷थारुवान राष्ट्रिय मोर्चाले पक्राउ परेका रानाको फिर्ता सर्त रिहाइको माग समेत गरेको छ ।

‘महेन्द्रनगर बाट अन्यत्रका लागि सवारी साधन नछुटेपनि अन्यत्रबाट फिर्ता आउने क्रम भने जारी छ । छोटो दुरीका सवारी साधन चल्न सकेका छैनन्,’ डिएसपी पौडेलले भने, ‘सुरक्षा व्यवस्था कडा पारिएको छ ।’