काठमाडौं, २९ चैत-सांसद विकास कोषलाई कोरोना भाइरस (कोभिड-१९) संक्रमणको नियन्त्रण तथा रोकथाममा लगाउनु पर्ने माग बढिरहेको छ ।यसैबीच नेपाल कम्युनिष्ट पार्टी (नेकपा)का प्रवक्ता नारायणकाजी श्रेष्ठले पनि कोभिड-१९ नियन्त्रणमा उक्त कोष प्रयोग गर्न ढिला गर्न नहुने बताएका छन् । उनले सामाजि संजाल ट्विटरमार्फत आफ्नो विचार राख्दै उनले सांसद विकास कोष अनाआवश्यक मात्र नभई अनुचित भएको भन्दै आएको बताए ।

उनले उक्त कोषको रकम ज्यादै न्यून खर्च भएको उल्लेख गर्दै बाँकी रहेको रकमलाई कोभिड-१९ को संकट नियन्त्रणका लागि कोभिड-१९ कोषमा राख्न माग गरेका हुन् । उनले सांसद विकास कोष शीर्षकमा अबदेखि बजेट नराख्न पनि सुझाएका छन् । यसो गर्नु सही भएको भन्दै निर्णय लिन ढिलाइ नगर्न आग्रह गरेका छन् ।

‘मैले पहिलेदेखि भन्दै आएको छु, सांसद विकास कोष आवश्यक छैन मात्र होइन अनुचित छ । अहिले कोभिड-१९ को संकटको सन्दर्भमा यसको खर्च नभएको रकम (ज्यादै कम मात्र खर्च भएको होला) कोभिड-१९ कोषमा राखौँ र अबदेखि यो शीर्षकमा बजेट नराखौँ’ उनले भने ‘यो सही छ। निर्णय गरिहालौँ ।’