विराटनगर, चैत २३–विराटनगर महानगरपालिकाको स्वामित्वमा रहेको गुद्री बजार आइतबारदेखि देखि पूर्ण रुपमा खाली भएको छ । गुद्री बजारलाई विराटनगर महानगपालिकाले तीन महिना अगावै देखि खाली गर्न गरेको प्रयासलाई गुद्री बजार सञ्चालकहरुले बेवास्ता गर्दै आएका थिए भने लकडाउनमा गुद्रीमा दिनदिनै लाग्ने भिडलाई नियन्त्रण गर्न प्रशासनलाई निकै समस्या भएको थियो ।

पछिल्लो समयमा मोरङका प्रमुख जिल्ला अधिकारी मदन भुजेलले चैत २२ गते भित्रमा गुद्री बजार खाली गर्न गरेको कडा निर्देशन पछि आज गुद्री बजार बस पार्कको पश्चिम स्थानीय नागेश कोइरालाको खाली जग्गामा सरेको छ । सो जग्गा गुद्री बजार सञ्चालकले मासिक रु.तीन लाख भाडा तिर्ने गरी २० वर्षका लागि लिजमा लिएका छन् ।

कृषि बजारलाई व्यवस्थित गर्न नेपाल सरकारले मोरङको कटहरीमा निर्माण गरिदिएको कृषि थोक बजारलाई गुद्री बजार सञ्चालकले महत्व नदिएकोले उनीहरु निजी स्तरबाटै गुद्री बजार सञ्चालनमा ल्याएको गुद्री बजार सब्जीमण्डी व्यवस्थापन समितिका अध्यक्ष पशुपति भगतले जानकारी दिए ।

कृषकले उत्पादन गरेको फलफूल तथा तरकारीलाई व्यवस्थित गरी बजारसम्म पुर्याउन कृषि थोक बजारले सहयोगीको भूमिका निर्वाह गर्न सकिने महत्वलाई बेवास्ता गर्दै सञ्चालनमा ल्याएको नयाँ गुद्री बजारलाई व्यवस्थित गर्न स्थानीय प्रशासनले ध्यान दिनु पर्ने स्थानीय राजेश ढङ्गोलले बताए ।

कृषि तथा पशुपालनको क्षेत्रमा काम गर्दै आएको प्याक्टले २०६८ सालमा तत्कालीन कटहरी गाबिससँग कृषि थोक बजारका लागि सम्झौता गरेको थियो । सोही सम्झौताको आधारमा नेपाल सरकारले २०७४ साल पुसमा व्यवसायिक कृषि व्यापार आयोजनाको काम अगाडि बढाए अनुरुप स्थानीय जनप्रीय माबि कटहरी र साविक कटहरी गाविसले आवश्यक पर्ने जग्गा उपलब्ध गराएको थियो ।

जुन जग्गामा अत्याधुनिक कृषि थोक बजारको निर्माण कार्य सम्पन्न भइसकेर एक वर्ष अघि पधानमन्त्री केपी शर्मा ओलीले उद्घाटन गरेका थिए । बजारमा तरकारी ४५ हजार मेट्रिकटन र फलफूल आठ हजार मेट्रिकटन अट्ने क्षमताको छ । विराटनगरको सिङ्घीया नदीसँग जोडिएको सो भवनबाट विगतमा कृषकहरुले भोग्दै आएको समस्या समाधान हुने विश्वास कषि विकास निर्देशनालय विराटनगरका वरिष्ठ अधिकृत अधिकृत प्रकाश डाँगीले गरेका थिए ।

नेपाल सरकारले कृषि क्षेत्रमा लागेका कृषकहरुको जीवनस्तर उकास्न तथा कृषकको उत्पादनलाई व्यवस्थित भण्डारण गर्न कामाण्डौंमा पुष्प र तरकारी थोक बजार, बुटवल र बिराटनगरमा व्यवसायिक कृषि थोक बजार, जनकपुर र दमकमा पशु बजार खोल्ने निर्णय गरे पछि कृषि क्षेत्र र कृषकहरुमा उत्साह पैदा भएको थियो ।

भूमि कन्सट्रक्शन प्रालिले ठेक्कामा लिइ रु.१७ करोडको लागतमा एउटा तरकारी थोक बजार र अर्को फलफूल थोक बजार सहित एक अत्याधुनिक भवन पनि निर्माण गरेको छ । भवनको लागि प्याक्टले रु.१२ करोड र नेपाल सरकारले रु.पाच करोड खर्च व्यहोरेको कन्सट्रक्शनका प्रोप्राइटर अभिनाश वोहराले जानकारी दिए ।

सुनसरी, मोरङ,झापा र धनकुटाका कृषकलाई लाभान्वित गराउने उद्देश्यले बनाएको यो बजारबाट स्थानीय बजारहरुमा तरकारी र फलफूल सजिलै उपलब्ध हुने विश्वासलाई यहाँका गुद्री बजार सञ्चालकले लत्याएको कुरालाई मानिसहरुले आलोचना पनि गरिरहेका छन् । बजारमा थोक विक्रेताका लागि ४० वटा र खुद्रा विक्रेताका लागि ३५ वटा स्टल बनाइएको छ ।