एजेन्सी, चैत २२-कोरोना भाइरसको संक्रमण फैलिन नदिन कुवेत सरकारले गरेको लकडाउन उल्लंघन गर्ने विदेशी श्रमिकलाई स्वदेश फिर्ता गर्ने भएको छ ।कुवेतको आन्तरिक मन्त्रालयले रात्रि समयका लागि लागू गरिएको कफर्यू उल्लंघन गर्ने विदेशी नागरिकलाई देश निकाला गर्ने समेत चेतावनी दिएको हो । मन्त्रालयका अनुसार हालसम्म कर्फ्यूको उल्लंघनको अभियोगमा २ सय जना पक्राउ परिसकेका छन् । तर, उनीहरूमध्ये कति विदेशी नागरिक हुन् भन्ने खुलेको छैन ।

कुवेतमा हालसम्म ४ सय १७ जनालाई कोरोना संक्रमण भएको छ । यसमध्ये ८२ जना निको भएका छन् । कुवेतमा थप एक नेपालीमा कोरोना संक्रमण देखिएको छ । योसँगै कुवेतमा कोरोना संक्रमित नेपालीको संख्या दुई पुगेको छ ।