कोरोना भाइरस संक्रमणको अवधिमा नेपाल बाहिरबाट आएर जानकारी नदिई घरमा बस्ने व्यक्तिहरूलाई जिल्ला प्रशासन कार्यालय सप्तरीले कारबाही गर्ने भएको छ ।

त्यस्ता व्यक्तिहरूलाई संक्रमक रोग ऐन २०२० को दफा ३ बमोजिम कानूनी कारबाही र दण्ड सजाय गर्ने प्रशासकीय अधिकृत जनार्दन कट्टेलद्वारा बुधवार जारी गरिएको सूचनामा उल्लेख छ । भाइरस संक्रमणको अवधिमा नेपाल प्रवेश गरी जानकारी नदिई विभिन्न स्थानमा बसोवास गरिरहेका वा गर्ने व्यक्ति, नेपाल सरकारले तोकेको सर्तबमोजिम क्वारेन्टाइनमा नबसि आदेशको बर्खिलाप कार्य गर्ने व्यक्तिलाई कारबाही गर्ने भएको छ ।

यसैगरी, भाइरसको संक्रमण रोकथाम, नियन्त्रण तथा उपचार कार्यमा असहयोग गर्ने, बाधा व्यवधान गर्ने वा गराउने व्यक्तिलाई सो ऐनअनुसार कारबाही गर्ने सूचनामा उल्लेख छ । भारत विहार राज्यसँग सिमाना जोडिएको सप्तरीमा केही दिनयता रातिको समयमा प्रहरीलाई छलेर नेपाल प्रवेश गरि घरमा बसोवास गरिरहेको पाएपछि कार्यालयले त्यस्ता व्यक्तिहरुलाई कारबाही गर्ने तयारी थालेको जनाएको छ ।