विराटनगर, चैत ९ –कोरोनाको रोकथाम र नियन्त्रणका लागि भन्दै विराटनगर महानगरपालीकाले महानगर क्षेत्रमा लाग्दै आएको साप्ताहिक हाटबजार आजबाट हटाउने निर्णय गरेको छ । विराटनगर महानगरपालिका भवनसँगै जोडिएको सडकमा दशकौंदेखि लाग्दै आएको साप्ताहिक शनिबारे लगाउने तयारी भएपनि महानगरको आग्रह पछि उठेको छ ।

विराटनगर महानगरपालिकाले हाटबजार बन्द गरेपछि भने यहाँका सुपर मार्केटहरु मालामाल भएका छन् । विराटनगरमा रहेको भाटभटेनी सुपरमार्केट विराटनगर , सेन्ट्रल मल, नेपाल बजार, आरके मल लगायतका सुपर मार्केटहरु भने शनिबार निर्वाधरुपमा सञ्चालनमारहेका छन् । सुपर मार्केटहरुमा अझै पनि आम सर्वसाधरण उपभोक्ताको भीड नियमित जस्तै छ । तर, सतर्कता भने नअपनाइने गरेको पाइएको छ ।

सरकारले २५ जना भन्दा बढी मानिस भीड नगर्नु भनेसँगै यस क्षेत्रका सपिङ मलमा भने शनिबार पनि उपभोक्ताहरुको ठूलो घुँइचो लागेको थियो । हजारौं उपभोक्ताहरु सुपर मार्केटमा जम्मा हुँदा पनि त्यहाँ सुरक्षाको कुनै उपयुक्त विधि अपनाइएको छैन । न त ज्वरो परीक्षण गर्ने थर्मोगनको प्रवन्ध गरिएको न त हात धुने र स्यानिटाइजरको प्रयोग गरिएको छ । खुला बजारहरुमा कडाई गरेपनि महानगरले यहाँका सुपरमार्केटको सुरक्षामा कुनै ध्यान दिएको छैन ।

कोरोना संक्रमणप्रति सरकार संवेदनशील भएको र आइतबारदेखि सबै सार्वजनिक सवारी साधनसमेत बन्द गर्ने घोषणा गरेपछि बल्ल विराटनगर महानगरपालिकाले निजी अस्पताल र अन्य पक्षसंग छलफलमा जुटेको छ । यसैगरी हरेक शनिबार विराटनगरको बुधहाट चोकमा लाग्ने लत्ताकपडाको बजार पनि उठाइएको छ । बिहानैबाट लत्ताकपडाको सस्तो बजारमा भिड लागेपछि महानगरले बजार बन्द गर्न भनेको थियो । महानगरको आग्रह अनुसार खुद्रा व्यापारीहरुले पसल बन्द गरेका छन् । उनीहरु बिहान १० बजेट आफ्ना सामान पोका पारेर घर फर्किएका थिए ।

महानगरपालिकामा बसेको सर्वपक्षीय बसेको बैठकमा साप्तहिकरुपमा लाग्ने हाटबजार बन्द गर्ने निर्णय गरिएको विराटनगर महानगरपालिकाका मेयर भीम पराजुलीले जानकारी दिए । कोरोना भाईरसको संक्रमणको जोखिम न्युनिकरण गर्ने उद्देश्यले साप्ताहिक हाटबजार केही दिनका लागी बन्द गर्ने निर्णय गरिएको मेयर पराजुलीलले बताए ।

कोरोना भाइरसबाट सतर्कता अपनाउन सरकारले २५ जना भन्दा बढी मानिस भीडभाड नगर्नु भनेको छ । महानगरपालीका छेउमा साप्ताहिक रुपमा लाग्दै आएको हाट नगर प्रहरी खटाई व्यापार गर्न आएका व्यापारीलाई हटाएको थियो । अचानक महानगरपालीकाले निर्णय गरेका प्रति व्यापारीहरुले भने असन्तुष्टी जनाएका थिए ।