धनुषा जिल्लाका सबैभन्दा ठूलो क्रसर उद्योगका सञ्चालकलाई प्रहरीले पक्राउ गरेको छ । धनुषाको गणेशमान चारनाथ नगरपालिका-६ स्थित रहेको कमला स्टोन क्रसर उद्योगका संचालक महादेव महतो पक्राउ परेका छन् । अनुगमन टोलीले शनिबार उक्त क्रसर उद्योगमा अगुगमन गर्दा अवैधरूपमा संचालन गर्दै आएको भेटिएपछि क्रसर उद्योग संचालक महतो पक्राउ परेका हुन् ।

गणेशमान चारनाथ नगरपालिकाका अनुसार महतोले झन्डै १० वर्षदेखि कुनै प्रकारको कर नतिरेको र झुठो बोल्दै सरकारी जग्गा कब्जा गरेर गैरकानूनीरूपमा उद्योग संचालन गर्दै आएका छन् । महतोलाई नगरपालिकले बारम्बार मौखिक र लिखित जानकारी गराउँदा पनि बेवास्ता गरेको नगर प्रमुख रामबाबू यादवले बताए ।

जिल्ला समन्वय समिति धनुषाका उपप्रमुख दीपक झाका अनुसार आफूहरूले उद्योगलाई नवीकरणको लागि आग्रह गर्दा अटेर गरेको र सोधखोज गर्दा उद्योग बन्द रहेको भन्दै महतोले झुठो बोल्दै आएका थिए ।