विराटनगर, चैत ६–कोरोना भाइरसको सम्भावित जोखिमलाई मध्यनजर गर्दै प्रदेश नम्बर १ का विभिन्न तीन स्थानमा क्यारेन्टाइन स्थापना गरिएको छ । प्रदेश नम्बर १ मा झापाको कमलगढी, मोरङको टाँडी र उदयपुरको बेलसोतमा नेपाली सेनाले कोरोना संक्रमणको आशंका गरिएकाहरुका लागि क्यारेन्टाइन स्थापना गरेको हो ।

छिमेकी मुलुक चीनमा पहिलो पटक देखा परेको कोरोना भाइरसको संक्रमण दिन प्रतिदिन विश्वका धेरै देशहरुमा फैलिसकेको साथै दक्षिणी छिमेकी मुलुक भारतमा समेत संक्रमीत फेला परिसकेको समयमा प्रदेश नम्बर १ मा उच्च सर्तकता सहित क्वारेन्टाइन स्थपना गरिएको हो । मोरङको टाँडीमा नेपाली सेनाले २ सय जनालाई राख्न सक्ने गरी क्वारेन्टाइन स्थापना गरेको नेपाली सेनाको २ नम्बर वाहिनिपति यामप्रसाद ढकालले जानकारी दिए ।

आवश्यकता बढेको खण्डमा क्वारेन्टाइन थप गर्न समेत सकिने वाहिनिपति ढकालले जानकारी दिनुभयो । स्वास्थ्य सुरक्षालाई मध्यनजर गर्दै कोरोनासंग जोडिने स्वास्थ्य सुरक्षाका पद्धतिहरु अपनाएर क्वारेन्टाइन वनाइएको सैनिक अस्पताल इटहरीकी महासेनानी डा.सरिता केसीले जानकारी दिए । टाँडीमा एक सय वटा टेन्टमा प्रत्येकमा कोरोनाका शंकास्पद दुई जनालाई गरि कुल २ सय जना राख्न सकिने गरि क्वारेन्टाइन स्थापना गरिएको हो । सो क्वारेन्टाइनमा स्वास्थ्य मापदण्ड अनुसार शंकास्पद विरामीहरुलाई निगरानीका साथै उपचार पद्धति सहित राखिने छ ।