सशस्त्र प्रहरीको टोली भारतले अतिक्रमण गरेको कालापानी क्षेत्रतर्फ हिँडेको छ । सशस्त्रको टोली दार्चुला सदरमुकाम खलंगाबाट मंगलबार त्यसतर्फ लागेको हो ।

कालापानी क्षेत्रभन्दा झण्डै १२ किलोमिटर दक्षिणी क्षेत्रमा निर्माण हुने बीओपी (बोर्डर आउट पोस्ट) निर्माण क्षेत्रको स्थलगत अध्ययन गर्न टोली त्यसतर्फ लागेको हो । सशस्त्र प्रहरी बल नेपाल नम्बर ५० गुल्म हेक्वार्टर दार्चुलाका गुल्मपति डम्बरबहादुर विष्टको नेतृत्वमा १५ जना सशस्त्र प्रहरीको टोली त्यस क्षेत्रको अध्ययन गर्न गएको हो ।

ब्यास गाउँपालिका– १, गागामा बन्ने बीओपी निर्माण क्षेत्रको स्थलगत अध्ययन र आफ्नो सीमाको नियमन गर्न टोली त्यसतर्फ लागेको गुल्मपति विष्टले जानकारी दिए ।

टोली १० चैतमा मात्रै खलंगा फर्किनेछ । अहिले बीओपी बन्ने क्षेत्र (ब्यास गाउँपालिका– १, गागा) मा हिउँ जमेकाले त्यस क्षेत्रको वास्तविकता बुझी आवश्यक काम अगाडि बढाउन सजिलो हुने गुल्मपति विष्टले बताए । २५ फागुनदेखि नेपाली सेनाको टोली पनि उत्तरी क्षेत्रको निगरानीका लागि ब्यास गाउँपालिकामा पुगेको छ ।