विराटनगर, फागुन २९–प्रदेश–१ को मन्त्रिपरिषद्ले स्थानीय तहलाई शसर्त अनुदान हस्तान्तरण गर्न अनुमति दिएको छ । आज बसेको मन्त्री परिषद्को बैठकले गरेका निर्णयका विषयमा जानकारी दिंदै सरकारका प्रवक्ता तथा आन्तरिक मामिला मन्त्री हिक्मतकुमार कार्कीले स्थानीय तहलाई सशर्त अनुदान हस्तान्तरण गर्न आर्थिक मामिला मन्त्रालयलाई अनुमति दिने निर्णय गरिएको बताए ।

यस्तै कोरोना नियन्त्रणका लागि एकीकृत कार्यायोजना पारित गर्ने, ओखलढुंगाको शिद्धिचरण नगरपालिकाका लागि आवश्यक जग्गा प्राप्तिका लागि संघीय सरकारलाई प्रस्ताव पठाउने निर्णय गरिएको उनले जानकारी दिए ।

मन्त्रिपरिषद्को बैठकले कानुन मस्यौदा समितिको म्याद असारसम्म थप गर्ने, विराटनगर महानगरपलिकाको जग्गा तथा भौतिक संरचनाको अध्ययन गर्न कार्यदल गठन गर्ने, औद्योगिक ग्राम बनाउनका लागि सुनसरीको अमडुवाको जग्गा हस्तान्तरण गर्न संघीय सरकारलाई आग्रह गर्ने निर्णय गरिएको कार्कीले जानकारी दिए ।

यस्तै बैठकले धनकुटाको औद्योगिक ग्राम सञ्चालनका लागि अनुमति दिने, प्रदेश सहकारी नियमावली स्वीकृत गर्ने, रेडियो एफएक सञ्चालन नियमावली पारित गर्ने, प्रदेश दानापदार्थ सम्बन्धमा व्यवस्था गर्न बनेको विधेयक स्वीकृत गर्ने, अपाङ्गता रोकथाम विधेयकको मस्यौदा स्वीकृत गर्नेलगायतका निर्णय गरेको छ ।