एक घण्टा पछि सर्‍यो मन्त्रिपरिषद् बैठक - News Birat

एक घण्टा पछि सर्‍यो मन्त्रिपरिषद् बैठक

न्यूज विराट
काठमाडौं, ३ मंसिर-प्रधानमन्त्री केपी शर्मा ओलीले सत्तारुढ नेपाल कम्युनिस्ट पार्टी (नेकपा) सचिवालय बैठकसँग जुधाएर बोलाएको मन्त्रिपरिषद् बैठक भने पछि सारेका छन् ।

दिउँसो १ बजे प्रधानमन्त्री निवास बालुवाटारमा बोलाइएको बैठक एक घण्टा ढिला गरिएको छ । समय परिवर्तन भएको सूचना मन्त्रीहरुलाई पठाइसकिएको बालुवाटार स्रोतले जनाएको छ ।

बुधबारका लागि तोकिएको सत्तारुढ नेकपा सचिवालय बैठकलाई चुनौती दिँदै प्रधानमन्त्री ओलीले मन्त्रिपपरिषद् बैठक पनि दिउँसो १ बजे नै बोलाएका थिए ।

मन्त्रिपरिषदमा प्रधानमन्त्रीसहित सचिवालय सदस्यहरु महासचिव विष्णु पौडेल अर्थमन्त्री, ईश्वर पोखरेल उपप्रधानमन्त्री र रामबहादुर थापा गृहमन्त्री छन् ।

कार्यकारी अध्यक्ष पुष्पकमल दाहालसहित सचिवालयका पाँच नेताको मागमा पाँच दिनअघि बसेको बैठक बुधबारका लागि स्थगित भएको थियो । गएको बैठकमा दुई अध्यक्षबीच आदानप्रदान भएका चार पत्र र दाहालको राजनीतिक प्रस्ताव अध्ययनका लागि उपलब्ध गराइएको थियो ।

राजनीतिक प्रस्तावमा दाहालले आफूमाथि गलत र निराधार आरोप लगाएको भन्दै प्रधानमन्त्रीले सचिवालयमा छलफल नगर्ने चेतावनी दिएका छन् । उनले प्रस्ताव विफल बनाउन आफू जुनसुकै कदम चाल्ने अवस्थामा पुग्ने स्पष्ट सन्देश दाहाललाई दिइसकेका छन् । प्रस्तावबारे प्रधानमन्त्री ओलीले वरिष्ठ नेता माधवकुमार नेपाल र वामदेव गौतमलाई बालुवाटारमै बोलाएर आफ्नो असन्तुष्टि राखेका थिए ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles