सुनसरी, फागुन १६–राष्ट्रिय प्रजातन्त्र पार्टी (राप्रपा) का अध्यक्ष कमल थापाले ‘घूस बार्गे्निङ प्रकरण’मा मुछिएका पूर्वमन्त्री गोकुल बाँस्कोटाजस्ता पात्र सरकारमा धेरै रहेका टिप्पणी गरेका छन् । सुनसरीमा मिडिया नेपालले गरेको पत्रकार सम्मेलनमा अध्यक्ष थापाले निष्पक्ष छानविन गर्ने हो भने सरकारमा धेरै गोकुल बाँस्कोटा भेटिने बताएका हुन् ।

अहिले कम्युनिस्ट नेताहरू निर्धक्कसँग भ्रष्टाचार गरिरहेको उनको आरोप छ । उनले भने, ‘नेताहरू कोहीसँग डराउँदैनन् । राजादेखि डर हुन्थ्यो, त्यो पनि साइड लगाए । धर्मदेखि डर थियो, धर्म मान्दैनन् । जनमत पैसामा किन्न सकिन्छ भन्ने ठान्छन् अनि किन डराउनु ?’

गणतन्त्र, धर्म निरपेक्षता र संघीयतामाथि आफूहरुको फरक मत रहेको उनले दोहो¥याए । अहिलेको संवैधानिक व्यवस्था जनताको चाहना नभएको उनले दाबी पनि गरे । गणतन्त्र पक्षधरले समेत मान्ने खालको संवैधानिक राजसंस्था आफूहरूको एजेन्डा रहेको र त्यसलाई जनताको मतद्वारा ल्याउन चाहेको उनले बताए ।

फरक प्रशङ्गमा थापाले अमेरिकी सहयोग निकाय मिलेनियम च्यालेन्ज कर्पोरेसन (एमसीसी) कार्यान्वयनमा सत्तारूढ दलले अनावश्यक बखेडा झिकेको आरोप लगाए । एमसीसी सम्झौता हस्ताक्षरमा आफ्नो पार्टीको भूमिका न्यून रहेको उनको भनाइ छ ।