विराटनगर, फागुन ४-समाजवादी पार्टीका अध्यक्ष उपेन्द्र यादवले संघियता असफल वनाउने खेलमा सरकार लागेको आरोप लगाएका छन् । प्रेस नेपाल मोरङले विराटनगरमा आज गरेको पत्रकार सम्मेलनमा बोल्दै उनले यस्तो बताएका हुन् । अध्यक्ष यादवले सरकारले प्रेस स्वतन्त्रता हनन गर्ने गरि मिडिया काउन्सील विधेयकसहित फोन ट्यापिङ र सेना परिचालनको बिषय प्रधानमन्त्रीको मातहतमा ल्याउने गरि बिधेयकहरु पारित गराउनेतर्फ लागेका कारण सरकारको भनाई र गराईमा फरक देखिएको बताए ।

उनले सरकारले सुखी नेपाली र समृद्ध नेपालको नारा लगाए पनि ब्यवहारमा दुखी नेपाली र दरिद्र नेपाल बनाउन लागि परेको दाबी गरे । उनले आफ्नो पार्टी संबिधान संशोधनको सर्तसहित सरकारमा गएपनि नेकपा र प्रधानमन्त्री स्वयं सहमतिबाट पछि हटेका कारण आफुहरु सरकारबाट बाहिरिएको प्रष्ट पारे ।

अध्यक्ष यादवले संबिधान संशोधन गरि सर्वस्वीकार्य नबनाएसम्म मुलुक अग्रगतिमा बढ्न नसक्ने बताउँदै संशोधन नगरे जनताले सडक संघर्षको बाटो रोज्ने चेतावनीसमेत दिए । पुर्व उपप्रधानमन्त्री समेत रहेका यादवले दुई नम्वर प्रदेशमा आफनो पार्टी सरकारवाट नबाहिरिने प्रस्ट पारे । समाजवादी पार्टी र राजपा विचको सहकार्य रहुुन्जेलसम्म दुई नम्वर प्रदेशको सरकारवाट पार्टी नह्टने उल्लेख गरे ।