विराटनगर । नेपाल फर्मास्यूटिकल एसोसिएसनले न्युट्रास्युटिकल औषधि नरहेको प्रस्ट्याउँदै उक्त वस्तुहरू आफ्नो फार्मेसीहरुबाट बिक्री वितरण नगर्न नगराउन आह्वान गरेको छ । नेपाल फर्मास्यूटिकल एसोसिएसनले एक प्रेस विज्ञाप्ती जारी गर्दै यस्तो आव्हान गरेको हो ।

‘बजारमा औषधि जस्तै बनावटमा फार्मेसीमै न्युट्रास्युटिकल्स नामको उत्पादनहरुको बिक्री वितरण हुन थालेको छ । सो किसिमको उत्पादन पोषण न्युट्रीशन र फर्मास्युटिकल बाट न्युट्रास्युटिकल भन्ने र औषधि नै हो भनि प्रयोगकर्तालाई भ्रममा पार्ने गरिएको छ । स्वास्थ्यमा कुनै पनि प्रविधि, बिधि उपयोग गर्न वैज्ञानिक प्रमाणमा आधारित अभ्यास हुन जरुरी छ । तर खाद्यको रूपमा दर्ता गरि औषधि जस्तो प्रस्तुत गरिने न्युट्रास्युटिकलहरु निम्न कारणहरुले स्वास्थ्य सुधारमा औषधि भनि प्रयोग गर्न अनुपयुक्त रहेको हाम्रो एसोसिएसन सबैलाई सुचित गराउन चाहन्छौं,’ एनपीएले जारी विज्ञाप्तीमा उल्लेखछ ।

औषधि व्यवस्था विभागमा औषधिको रुपमा दर्ता रहेको आईरन, मल्टीभिटामिन आदि भन्दा न्युट्रास्युटिकलको रूपमा आउंदा कयौं गुना बढी मूल्य भएर बजारमा बिक्रि वितरण भइरहेको छ । औषधिहरुले भ्रमात्मक प्रचार गर्न नपाईने र विज्ञापन गर्न स्वीकृति लिन प्रावधान हुँदा न्युट्रास्युटिकलहरुको मनगढन्ते विज्ञापन गर्दै, हुँदै नभएको स्वास्थ्य लाभ र फाईदाहरु पेश गरी जनता ठग्ने र स्वास्थ्यमा जोखिम हुन सक्ने देखिन्छ । औषधि जस्तो न्युट्रास्युटिकलहरु वृद्ध, दिर्घ रोगि, गर्भवती, बच्चामा प्रयोग गर्न मिल्ने नमिल्ने र कसरी गर्ने केहि पनि तथ्यांक उपलब्ध नभएको एनपीएले जनाएको छ ।

‘विश्व बैंकको सन् २०२१ को आकडा अनुसार नेपालमा अझै पनि ५१.२६ प्रतिशत रकम व्यक्तिले आफ्नो गोजीबाट खर्च गरी औषधि तथा स्वास्थ्य सेवा पाउनुपर्ने बाध्यता रहेको अवस्थामा यस्ता बस्तुहरुको प्रयोगले बिरामीलाई थप आर्थिक भार पर्ने निश्चित छ । स्वास्थ्य तथा जनसंख्या मन्त्रालयको पटकपटकको निर्देशन तथा औषधिको नियामक निकाय औषधि व्यवस्था विभागले समय समयमा सुचना प्रकाशित गरेर बिरामीको उपचारमा त्यस्ता बस्तु प्रयोग नगर्न, बिरामीलाई भ्रममा पारेर बिक्रीवितरण नगर्न सार्बजनिक सुचना जारी गर्दै आईरहेको तथा निरिक्षण गर्दा बर्खिलाप पाईएमा कारबाही समेत गरिरहेको छ,’ एनपीएका अध्यक्ष ललित मोहन पन्त र महासचिब संजिव शर्मा कट्टेलले हस्ताक्षर गरिएको विज्ञाप्तीमा भनिएको छ, ‘अतः न्युट्रास्युटिकल औषधि नरहेको प्रस्ट्याउँदै नेपाल फर्मास्यूटिकल एसोसिएसन सम्पूर्ण फार्मासिस्ट तथा असिस्टेन्ट फार्मासिस्टहरुमा उक्त वस्तुहरू आफ्नो फार्मेसीहरुबाट बिक्री वितरण नगर्न नगराउन समेत जोडदार आह्वान गर्दछौं ।’