काठमाडौं, माघ २२–नेपाली कांग्रेसका उपसभापति विजयकुमार गच्छदारको सांसद पद निलम्बन भएको छ । नेता गच्छदारमाथि अख्तियार दुरुपयोग अनुसन्धान आयोगले ललिता निवास जग्गा व्यक्तिको नाममा दर्ता गर्न पदमा बसी भूमिका खेलेको भन्दै भ्रष्टाचारको अभियोगमा विशेष अदालतमा बुधबार मुद्दा दर्ता भएपछि उनको सांसद पद स्वतः निलम्बनमा परेको हो ।

सुनसरीको क्षेत्र नं ३ बाट संघीय संसदमा नेपाली कांग्रेसको तर्फबाट विजयी गच्छदारलाई तत्कालीन भौतिक योजना तथा निर्माणमन्त्रीको हैसियतले प्रधानमन्त्री निवाससमेत रहेको बालुवाटारस्थित ललिता निवासको सरकारी जग्गा व्यक्तिको नाममा दर्ता गरी भ्रष्टाचार गरेको अभियोग लागेको छ । गच्छदारलाई भ्रष्टाचार निवारण ऐन, २०५९ को दफा ८ को उपदाफा (१ ) र सोही ऐनको दफा १७ ले निर्देश गरेबमोजिम दफा ३ को उपदफा (१) र दफा ३ को उपदफा (१) को खण्ड (झ) र सोही ऐनको दफा २४ बमोजिम थप सजाय गरी सोही ऐनको दफा ८ को उपदफा (१) र दफा १७ बमोजिम बिगो असुलउपर र जफत हुने माग दाबी गरेको छ ।

संसद नियमावलीको नियम २४४ मा भने फौजदारी अभियोग लागेको सांसदले सांसद पदको हैसियतले कुनै कार्य गर्न वा कुनै अधिकार वा उन्मुक्ति प्राप्त हुन नपाउने र त्यस्तो अवधिभर निजको पारिश्रमिक, सेवा र सुविधा स्थगन हुने व्यवस्था छ । तर सांसद गच्छदारमाथि भ्रष्टाचारको अभियोगमा मुद्दा दर्ता भएपछि भ्रष्टाचार निवारण ऐन आकर्षित भएको हो ।

नेपाली कांगे्रसका २३ जनाले संघीय संसदमा प्रत्यक्ष विजयी भएर सांसद बनेका थिए भने ४० जना समानुपातिकबाट सांसद भएका थिए । कांग्रेसको तर्फबाट रौतहट क्षेत्र नं २ बाट निर्वाचित मोहम्मत अफताव आलमको भने फौजदारी अभियोगमा जेलमा राखिए पनि सांसद पद निलम्बन भएको छैन ।