काठमाडौं, माघ १०–विदेशी र नेपाली पाइलटबीच सेवा सुविधामा चरम विभेद गरिएको भन्दै नेपाल एयरलाइन्सका पाइलटहरूले सामूहिक राजीनामा दिएका छन् । नेपाल भ्रमण वर्ष चलिरहेका बेला पाइलटहरूले तीन महिनापछि लागू हुने गरी राजीनामा बुझाएका हुन् । व्यवस्थापनले नेपाली स्थायी कर्मचारीलाई बढी लगाउने तर सेवा सुविधा भने विदेशीलाई धेरै दिएको लगायतमा असन्तुष्टि जनाएका छन् ।

पाइलटहरूका अनुसार विदेशीले महिनामा ४६ घन्टा मात्र जहाज उडाउँछन् भने हप्तामा दुई दिन छुट्टी पाउँछन् । त्यसमा उनीहरूले १५ लाख तलब पाउँछन् । तर, नेपाली स्थायी पाइलटले महिनामा ९५ घन्टा जहाज उडाउने र हप्तामा १ दिन मात्र बिदा पाउने गरेका छन् । क्याप्टेन श्रवण रिजालका अनुसार तलबमा विदेशी र नेपालीबीच ठूलो खाडल भएका कारण कर्मचारीमा असन्तुष्टि रहेको बताए । तीन महिनाभित्र आफ्ना माग सम्बोधन नगरे सबै विमान ग्राउण्डेड हुने उनीहरूको चेतावनी छ । एयरबस ३३० वाइडबडी जहाज उडाउने १५ मध्ये १३ जना र एयरबस ३२० जहाज उडाउने २५ मध्ये १२ जनाले राजीनामा दिएका छन् ।