विराटनगर । कोशी प्रदेश सरकारलाई एमाले र काँग्रेसको संयुक्त कार्यदलले आफ्नो न्यूनतम साझा कार्यक्रम हस्तान्तरण गरेको छ ।

नेकपा एमाले र नेपाली कांग्रेस गठबन्धनको प्रदेश सरकारले न्यूनतम साझा कार्यक्रम बनाउन गठित कार्यदलले बुझाएको न्युनतम साझा कार्यक्रम बिहीबार सार्वजनिक गरिएको हो ।

कोशी प्रदेश सरकारले पर्यटन क्षेत्रको विकासका लागि छिमेकी देशको मुख्य सहरमा‘टुरिजम सो’ गर्ने योजना बनाएको छ ।
सरकारले क्यासिनो विकासदेखि गाँजा उत्पादनलाई न्यूनतम साझा कार्यक्रममा समेटेको छ । गत असोज ६ गते गठन भएको कार्यदलले तय गरेको न्यूनतम साझा कार्यक्रममा क्यासिनोको विकास र गाँजादेखि घरेलु मदिराको ‘ब्राण्डिङ’लाई समावेश गरेको हो ।

मन्त्रीसहित कांग्रेस र एमालेका ३–३ जना रहेको कार्यदलले न्यूनतम साझा कार्यक्रम तयार पारेर मुख्यमन्त्री हिक्मतकुमार कार्कीलाई बुझाएको थियो ।

मुख्यमन्त्रीलाई बुझाइएको न्यूनतम साझा कार्यक्रममा प्रदेशमा विदेशी पर्यटकको आकर्षणका लागि क्यासिनोको विकास गर्ने नीति सरकारले लिएको छ । क्यासिनोमा नेपालीलाई प्रवेश निषेध छ । अनुगमन नहुँदा नेपालीहरु निर्वाध रुपमा क्यासिनोमा प्रवेश गर्छन् । भएका क्यासिनो व्यवस्थित गर्न नसकेको अवस्थामा सरकारले क्यासिनो विकास गर्ने नयाँ कार्यक्रम बनाएको हो । कार्यदलका सदस्य तथा एमाले प्रमुख सचेतक रेवतीरमण भण्डारीले विदेशी पर्यटकलाई आकर्षित गर्नका लागि साझा कार्यक्रममा क्यासिनोको विषय समावेश गरिएको जानकारी दिए ।

पर्यटन क्षेत्रको विकासका लागि छिमेकी देशका मुख्य सहरहरुमा ‘टुरिजम सो’ गर्नेदेखि प्रदेशमा भौतिक संरचना विस्तार, विराटनगर र भद्रपुरबाट अन्तरदेशीय उडान तथा ‘माउण्टेन फ्लाइट’ गर्नेलगायत सरकारको प्राथमिकतामा परेका छन् । खुर्कोट– चतरा, तुम्लिङटार – चतरा र ताप्लेजुङ तमोर दोभान– चतरा जल यातायातको सम्भाव्यता अध्ययन गर्ने सरकारको तयारी छ ।

प्रदेश सरकारको न्यूनतम साझा कार्यक्रमको सूचीमा राष्ट्रिय आय र नागरिकको आयमा वृद्धि गर्न व्यवस्थित ढंगले गाँजा खेती उत्पादन गर्न तथा स्थानीयस्तरमा उत्पादन हुने रक्सी ‘ब्राण्डिङ’ गरी दुवै वस्तुलाई मान्यता दिलाउन संघीय सरकारसँग समन्वयात्मक पहल र प्रयत्न गर्ने उल्लेख छ ।

८ पेज लामो कार्यक्रममा १५ वटा नीति र ५ उप उपशीर्षकमा ७५ वटा उपबुँदा राखिएको छ ।

सरकारले गर्भवती तथा सुत्केरी महिला र १० वर्षमुनिका बालबालिकाको उपचारलाई प्रभावकारी बनाउने र उपचार निःशुल्क गर्ने विषयलाई विकेन्द्रीकृत गर्दै सेवा विस्तार गर्ने, शैलेजा आचार्य हृदय रोग केन्द्र विराटनगरलाई नयाँ ढंगले सञ्चालन गर्ने लगायत प्राथमिकता छन् ।

सरकारले विद्यालय शिक्षालाई उत्पादनसँग जोड्नका लागि आवश्यक नीति तथा कार्यक्रम तय गरी कार्यान्वयन गर्ने विषयलाई प्राथमिकतामा राखेको छ ।
मुख्यमन्त्री हिक्मतकुमार कार्कीले कार्यदलले बनाएको साझा कार्यक्रमलाई आधार बनाएर सरकारले काम गर्ने बताए ।

सरकारको न्यूनतम साझा कार्यक्रम तयार पार्ने कार्यदलमा एमालेबाट आर्थिक मामिला तथा योजनामन्त्री रामबहादुर मगर, एमालेका प्रमुख सचेतक रेवतीरमण भण्डारी र प्रदेश सांसद तिलचन पाठक तथा कांग्रेसबाट भौतिक पूर्वाधार विकासमन्त्री भूपेन्द्र राई, कांग्रेस संसदीय दलका उपनेता हिमाल कार्की र कांग्रेसका प्रमुख सचेतक गोपाल तामाङ थिए ।