विराटनगर । मोरङ कटहरी गाउँपालिका – १ जमटोकी घर भएका २२ वर्षीय करण कामत हत्या भएको छ । चार जना युवाले कैची प्रहार गरेर उनको सोमबार राती हत्या गरेका हुन् ।

हत्या आरोपमा विराटनगर–११ घर भइ विराटनगर–२ स्थित विराट नर्सिङ होमअगाडि डेरा गरेर बस्दै आएका २० वर्षीय सोनु गिरी, ताप्लेजुङको दोखु घर भइ नर्सिङ होमअगाडि डेरा बस्दै आएका १८ वर्षीय सन्तोष भनिने निमा दावा शेर्पा, भोजपुरको भुल्के घर भइ नर्सिङ होमअगाडि डेरा बस्दै आएका २० वर्षीय सञ्जय गिरी र मोरङको रंगेली घर भइ विराटनगर–२ स्थित सनीहाटमा डेरा बस्दै आएका १६ वर्षीय बालक रहेका छन् । पक्राउ परेका मध्ये शेर्पाले कैची प्रहार गरेको प्रहरीले जनाएको छ ।
केटीको विषयलाई लिएर विवाद भएको प्रराम्भिक चरणको अनुसन्धानबाट देखिएको मोरङ प्रहरीका प्रवक्ता डिएसपी ज्ञानेन्द्र बहादुर बस्नेतले जानकारी दिए । मृतक र घाइते पक्षका युवाहरुले पीडक पक्षका केटीलाई जिस्क्याएको विषयमा विवाद भएको प्रहरीले जनाएको छ । ‘विवाद भएपछि करणमाथि कैची प्रहार भएको देखिएको छ,’ उनले भने ।

विराटनगर –२ स्थित नेपाल टेलिकमनजिक सेन्ट जोसेफ मोडमा सोमबार राति १० बजेतिर करणसहित उनका साथीहरूमाथि आक्रमण भएको उनले बताए । आक्रमणबाट करण गम्भिर घाइते भए । उपचारको क्रममा उनको कोशी अस्पतालमा मृत्यु भएको छ । उनको छात्ती र कम्मरको भागमा ‘कैची’ ले घोपेको चोट छ । शवलाई पोस्टमार्टमका लागि कोशी अस्पतालमै राखिएको छ । घटनामा कटहरी–१ जमटोकीका २२ वर्षीय विक्रम मण्डल र १७ वर्षीय अमन राय घाइते भएका छन् ।
घाइतेमध्ये कोखा र ढाडमा चोट देखिएका रायको अवस्था गम्भीर रहेको प्रहरीले जनाएको छ । पाखुरा र ढाडमा चोट देखिएका मण्डलको अवस्था मध्यम छ । कोशी अस्पतालमा सम्भव नभएपछि दुवै जना घाइतेलाई थप उपचारका लागि नोबेल शिक्षण अस्पताल लगिएको छ । बाटोमा हिँड्दै गरेकाहरुले कामतसहित ३ जनालाई घाइते अवस्थामा फेला पारेर उपचारका लागि अस्पताल लगेको प्रहरीले जनाएको छ ।
घटनामा प्रयोग गरिएको कैंची विराट नर्सिङ होमअगाडिको गोलबजार फार्मेसीबाट बरामद भएको डिएसपी बस्नेतले जानकारी दिए । उनका अनुसार शेर्पा र पुरीले नर्सिङ होमअगाडिको फार्मेसी (औषधि पसल)मा काम गर्ने गरेको पत्ता लागेको छ । घटनामा संलग्नलाई उनीहरु बस्दै आएको स्थानबाटै पक्राउ गरिएको बस्नेतले बताए ।
उनका अनुसार घटनामा संलग्नविरुद्ध कर्तव्य ज्यान मुद्दामा म्याद थप गरि अनुसन्धान सुरु गरिएको छ ।