विराटनगर । विराटनगर ३ मा रहेको मानगढ खानेपानीको विषयमा नेकपा एमालेका विराटनगर महानगरपालिकाका अध्यक्षसहित तीन जना गरेको कारवाही फिर्ता लिन माग गरिएको छ ।
एमाले विराटनगर महानगरका १९ वटै कमिटीका अध्यक्ष, सचिव तथा इन्चार्जहरुले जिल्ला अध्यक्ष बाबुराम कार्कीलाई शनिबार ज्ञापन पत्र बुझाउँदै तत्काल कारवाही फिर्ता लिन माग राखेका हुन् ।
पार्टीको आधिकारिक निर्णय समेत नभएको विषयमा कामचलाउ जिल्ला संगठन समितिको अध्यक्ष कार्कीले जिल्ला कमिटीको बैठकमा निर्णय र माइन्यूट नै नभएको विषयमा विधान विपरित कारबाहीको चिठ्ठी दिएको भन्दै उनीहरुले आपत्ति जनाएका छन् । उनीहरुले खानेपानी संस्थामा निर्वाचनको बहानामा एमालेलाई नै सिद्धाउने खेल भएको भन्दै उनीहरुले कारबाही फिर्ता गर्नु पर्ने माग गरे । ज्ञापन पत्र बुझाउँदै उनीहरुले पार्टीले स्थानीय कार्यकर्ताहरुको भावना विपरित निर्णय गर्दै पार्टी कै छवि धुमिल बनाउन खोजेको आरोप लागाए । नेकपा एमाले मोरङले नेकपा एमाले विराटनगर कमिटी अध्यक्ष सागर थापा, महानगर कमिटी कार्यालय सदस्य नवराज नेपाल र मानगढ खानेपानीको अध्यक्षका उम्मेदवार भएका एमाले वडा कमिटी ३ का अध्यक्ष लालमणि भट्टराईलाई कारबाही गरेको छ ।
यस्तै वडा नम्बर ३ का वडा सदस्य सुरज न्यौपाने र जिल्ला सदस्य मुकेश बुढाथोकीलाई स्पष्टिकरण सोधेको छ । पार्टीको निर्णय विपरित उम्मेदवार बनेको, उम्मेदवारको प्रचार प्रसार गरेको आरोप लगाउँदै उनीहरुलाई कारवाही गरेको हो । तर यो कारवाही विधान विपरित भएको भन्दै उनीहरुले एमाले जिल्ला कमिटीको ध्यानाकर्षण गराएका हुन् । १९ वटै वडाको तर्फबाट जारी गरिएको अपिलमा अमुक नेताको व्यक्तिगत कुन्ठा पुरा गर्न पार्टीको गरिमामय पदको दुरुपयोग भएको भन्दै नेकपा एमाले पार्टीलाई विराटनगर महानगरपालिका भित्र कमजोर बनाउन षड्यन्त्र गरिएको उल्लेख गरिएको छ । २४ घण्टा भित्र कारवाही फिर्ता नगरे हुने क्षति जिम्मा पार्टी जिल्ला कमिटीका नेतृत्वले लिनु पर्ने चेतावनी अपिलमा उल्लेख गरिएको छ । यस्तै पार्टी कार्यालय पाञ्चालीमा भेला भएका १९ वटै वडाका पदाधिकारी तथा अध्यक्षहरुले शुक्रबारे बसेको वडा कमिटी अध्यक्षको बैठकको निर्णयको माइन्यूट समेत हस्तान्तरण गरेका छन् ।