इराकका राष्ट्रपति रहेका सद्दाम हुसेनलाई ३० डिसेम्बरमा फाँसी दिइएको थियो । उनको मृत्युको १५ वर्षपछि छोरी रगद हुसेनले इराकका नागरिकहरूलाई अरब क्षेत्रकाे परिवर्तनका लागि भूमिका निर्वाह गर्न अपिल गरेकी छन् ।

आफ्ना पिताकाे एक ठूलाे तस्वीरकाे अगाडि बसेर रगदले एकअर्काप्रतिकाे शत्रुता त्यागेर एकजुट हुन अपिल गरेकी हुन् । उनले सम्प्रदाय र आफ्नाे पृष्ठभूमिलाई पछाडि छाडेर एकअर्कालाई माफी दिएर अघि बढ्न पनि आग्रह गरेकी छन् ।

रगदले आफ्नाे सम्बाेधनमा इराकले अरबका कुनै पनि गुटमा सहभागी हुन नहुने धारणा राखेकी छन् ।

उनले भनेकी छन्, ‘इराकले अरबका कुनै गुटमा सहभागी हुन जरुरी छैन । म तपाईँहरूलाई आग्रह गर्छु कि आपसी मतभेदलाई बिर्साैँ । हामी एकजुट भयाैँ भने मात्रै इराकका लागि केही गर्न सक्नेछाैँ ।’

रगदले आफ्ना पिताकाे १५औँ स्मृति दिवसका अवसरमा एक रेकर्ड गरिएकाे सन्देश जारी गर्दै यस्ताे अपिल गरेकी हुन् । रगदले भविष्यमा इराककाे राजनीतिमा आउने सम्भावनालाई इन्कार गरेकी छैनन् ।

सद्दाम हुसेनकी जेठी छाेरी रगदकाे विद्यालय पढ्दै गर्दा विवाह भएकाे थियाे । त्यतिबेला उनकाे उमेर १५ वर्षकाे थियाे । उनकाे विवाहका बेला इराक र इरानबीच युद्ध चलिरहेकाे थियाे ।

सन् १९९६काे फरवरीमा २५ वर्षकाे हुँदा रगदले आफ्नाे परिवारकाे आग्रहमा सम्बन्धबिच्छेद गरेकी थिइन् । त्यसकाे दुई दिनपछि उनका पतिकाे हत्या भएकाे थियाे ।

सन् २००६ को ३० डिसेम्बरमा सद्दाम हुसेनलाई फाँसी दिइएको थियो । मानवताविरुद्धको अपराध गरेको अभियोगमा उनलाई झुन्ड्याएर मृत्युदण्ड दिइएको थियो ।